പൊലീസ് പിടികൂടി സ്റ്റേഷനില്‍ എത്തിച്ച പ്രതികള്‍ പൊലീസുകാരുടെ യൂണിഫോം വലിച്ചു കീറി. മദ്യലഹരിയില്‍ അര്‍ധരാത്രിയില്‍ നടുറോഡില്‍ ഏറ്റുമുട്ടിയതിന്റെ പേരിലാണ് ഇവരെ സ്റ്റേഷനില്‍ എത്തിച്ചത്. ഒട്ടകത്തലമേട്‌ തെക്കുപുറത്ത്‌ മനു(24), സഹോദരന്‍ മിഥിന്‍(23), വലിയകണ്ടം പാഴുവേലിപ്പറമ്പില്‍ ഷിജോ(21) എന്നിവരാണ്‌ അറസ്റ്റിലായത്‌.
പൊതുമുതല്‍ നശിപ്പിച്ചതിനും പൊലീസുകാരനെ കയ്യേറ്റം ചെയ്‌തതിനും യുവാക്കള്‍ക്കെതിരെ പൊലീസ് കേസ് റജിസ്റ്റര്‍ ചെയ്‌തു. ഇവരെ കോടതി റിമാന്‍ഡ്‌ ചെയ്‌തു.
കുമളി-മൂന്നാര്‍ റോഡില്‍ രാത്രി പരസ്പരം ഏറ്റുമുട്ടിയപ്പോള്‍ വിവരമറിഞ്ഞ്‌ എത്തിയ പൊലീസുകാര്‍ ഇവരെ സ്റ്റേഷനില്‍ എത്തിച്ചു. ഇവര്‍ പൊലീസുകാരന്റെ യൂണിഫോം വലിച്ചുകീറുകയും സെല്ലിന്റെ ഗേറ്റിലെ ഗ്രില്‍ വളച്ച്‌ തകര്‍ക്കുകയും ചെയ്‌തതായാണ്‌ കേസ്.
