അഭയ കേസിലെ നാര്‍ക്കോ സിഡി മാധ്യമങ്ങള്‍ക്ക് ലഭിച്ചത് അന്വേഷിക്കണമെന്ന് ആവശ്യപ്പെട്ട് കേസിലെ മൂന്നാം പ്രതി സിസ്റ്റര് സെഫി നല്‌കിയ ഹര്‍ജി പരിഗണിക്കുന്നത് എറണാകുളം സി ജെ എം കോടതി ഈ മാസം 23ലേക്ക് മാറ്റി. കേസില്‍ രഹസ്യവിചാരണ വേണമെന്ന് രണ്ടാം പ്രതിയുടെ അഭിഭാഷകന്‍ കോടതിയില്‍ ആവശ്യപ്പെട്ടു.
അതേസമയം, അഭയ കേസിലെ പ്രതികളെ നാര്‍ക്കോ പരിശോധനയ്‌ക്ക് വിധേയമാക്കിയത് റെക്കോര്‍ഡ് ചെയ്ത സിഡിയുടെ പകര്‍പ്പ് മാധ്യമങ്ങള്‍ക്ക് നല്‍കിയത് തങ്ങളല്ലെന്ന് സി ബി ഐ വ്യക്‌തമാക്കി. നാര്‍ക്കോ സിഡി ചോര്‍ന്നതിനെക്കുറിച്ച് അന്വേഷണം നടത്തുന്നതില്‍ എതിര്‍പ്പില്ലെന്നും സി ബി ഐ കോടതിയെ അറിയിച്ചു. രഹസ്യവിചാരണ വേണമെന്ന ആവശ്യം തങ്ങള്‍ നേരത്തെ ആ‍വശ്യപ്പെട്ടതാണെന്നും സി ബി ഐ കോടതിയെ അറിയിച്ചു.
സി ഡികള്‍ മാധ്യമങ്ങള്‍ക്ക് എങ്ങിനെ ലഭിച്ചുവെന്നതിനെക്കുറിച്ച് അന്വേഷണം നടത്തണമെന്നും കേസിന്‍റെ വിധിവരുന്നതുവരെ ഇത്തരം നടപടികള്‍ വിലക്കണമെന്നും സെഫി ഹര്‍ജിയില്‍ ആവശ്യപ്പെട്ടിരുന്നു. എറണാകുളം സി ജെ എം കോടതി പ്രതിഭാഗത്തിന് കൈമാറിയ സിഡികളിലെ ദൃശ്യങ്ങള്‍ ദൃശ്യമാധ്യമങ്ങള്‍ സം‌പ്രേക്ഷണം ചെയ്തിരുന്നു.
പൊതുരേഖയാക്കാതെ ഭദ്രമായി സൂക്ഷിക്കുന്ന നാര്‍കൊ സി ഡിയിലെ ദൃശ്യങ്ങള്‍ സം‌പ്രേക്ഷണം ചെയ്യരുതെന്ന് എറണാകുളം ചീഫ് ജുഡീഷ്യല്‍ മജിസ്ട്രേറ്റിന്‍റെ ഉത്തരവിട്ടതിനെ തുടര്‍ന്ന് നാര്‍കൊ സി ഡിയിലെ ദൃശ്യങ്ങള്‍ പല ചാനലുകളും അപ്പോള്‍ തന്നെ പിന്‍‌വലിക്കുകയും ചെയ്തിരുന്നു.
അഭയ കൊല്ലപ്പെട്ട ദിവസം വൈദികര്‍ക്ക് വാതില്‍ തുറന്ന് കൊടുത്തത് താനാണെന്ന് സെഫി. സിസ്റ്റര് അഭയയെ കോടാലി, ചുറ്റിക എന്നിവ ഉപയോഗിച്ച് തലയ്ക്കടിച്ച് കൊല്ലുകയായിരുന്നു. ഫാദര്‍ കോട്ടൂര്‍, പൂതൃക്കയില്‍ എന്നിവരുമായി സ്നേഹബന്ധമാണുണ്ടായിരുന്നതെന്നും സെഫി സി ഡിയില്‍ വ്യക്തമാക്കുന്നുണ്ട്.
