റോഡരികില്‍ മരിച്ചനിലയില്‍ കാണപ്പെട്ട വൃദ്ധയുടെ മരണം കൊലപാതകമാണെന്ന് തെളിഞ്ഞു.
തുടര്‍ന്ന് പേരമകനേയും അദ്ദേഹത്തിന്റെ ഭാര്യയേയും പൊലീസ് അറസ്റ്റ് ചെയ്തു. അന്വേഷണത്തിനെന്ന വ്യാജേനെ പ്രതികളെ പൊലീസ് സ്റ്റേഷനില്‍ വിളിച്ചുവരുത്തി അറസ്റ്റ് ചെയ്യുകയായിരുന്നു.
തുടര്‍ന്നാണ് നബീസ(71)യുടെ മകള്‍ ഫാത്തിമയുടെയും കരിമ്പുഴ തോട്ടര പടിഞ്ഞാറേതില്‍ വീട്ടില്‍ മുഹമ്മദ് എന്ന മമ്മുവിന്‍റെയും മകന്‍ ബഷീര്‍ (33), ഭാര്യ കണ്ടമംഗലം സ്വദേശിനി ഫസീല (27)എന്നിവര്‍ പൊലീസ് പിടിയിലായത്.
സൗദിയിലെ ജിദ്ദയില്‍ ഡ്രൈവറായി ജോലി ചെയ്തിരുന്ന ബഷീര്‍ കഴിഞ്ഞ മേയ് 12നാണ് നാട്ടിലെത്തിയത്. ഈ മാസം അവസാനത്തോടെ തിരിച്ചുപോവാനിരിക്കുകയായിരുന്നു. ബഷീര്‍ ഭാര്യയുമൊത്ത് കുന്തിപ്പുഴയിലെ നമ്പിയംകുന്നില്‍ വാടകയ്ക്കു വീടെടുത്താണു നാട്ടിലെത്തിയപ്പോള്‍ താമസിച്ചിരുന്നത്. വീട്ടില്‍ തിരിച്ചു കയറാന്‍ വേണ്ടിയാണ് അര്‍ബുദരോഗിയായ നബീസയെ ഒഴിവാക്കാനായി ഇരുവരും ഇത്തരത്തിലൊരു തന്ത്രം മെനഞ്ഞത്.
ഫോറന്‍സിക് വിദഗ്ധര്‍ സംഭവ സ്ഥലത്തെത്തി തെളിവെടുപ്പ് നടത്തി. കേസന്വേഷണത്തിന് പാലക്കാട് എസ്.പി ഡോ. ശ്രീനിവാസ്, ഷൊര്‍ണൂര്‍ ഡി.വൈ.എസ്.പി സുനീഷ്കുമാര്‍, മണ്ണാര്‍ക്കാട് സി.ഐ എം. മുഹമ്മദ് ഹനീഫ, എസ്.ഐമാരായ ഷിജു എബ്രഹാം, മുരളീധരന്‍, എ.എസ്.ഐമാരായ റോയ് ജോര്‍ജ്, അബ്ദുല്‍ സലാം, സി.പി.ഒമാരായ മണികണ്ഠന്‍, ബെന്നി, സതീഷ്, ഷാഫി, സഹദ്, അഭിലാഷ്, വനിതാ സി.പി.ഒമാരായ നിത്യ, ഓമന എന്നിവരാണ് നേതൃത്വം നല്‍കുന്നത്.
