വീടിനു സമീപത്തുള്ള പാറക്കുളത്തിൽ വീണ കൊച്ചുമകളും കൊച്ചുമകളെ രക്ഷിക്കാനിറങ്ങിയ മുത്തച്ഛനും മുങ്ങിമരിച്ചു. തിടനാട് കാവുംകുളം മുതുപ്ലാക്കൽ ബേബിച്ചൻ സെബാസ്റ്റിയൻ (64), ഇദ്ദേഹത്തിന്റെ മകൻ രതീഷിന്റെ മകൾ ലിയാമറിയ (6) എന്നിവരാണ് കഴിഞ്ഞ ദിവസം വൈകിട്ട് അഞ്ച് മണിയോടെ മുങ്ങിമരിച്ചത്.
ബേബിച്ചനും കൊച്ചുമക്കളായ ലിയാമ്മരിയായും ലിജോമോനും പാറക്കുളത്തിൽ കുളിക്കാനെത്തിയതായിരുന്നു. കാൽ വഴുതി കുളത്തിൽ വീണ ലിയാമരിയയെ രക്ഷിക്കാനുള്ള ശ്രമത്തിൽ ബേബിച്ചനും വെള്ളത്തിൽ മുങ്ങിത്താണു. ലിജോയുടെ നിലവിളികേട്ട് വീട്ടുകാരും നാട്ടുകാരും ചേർന്ന് ഇരുവരെയും രക്ഷിച്ച് ഈരാറ്റുപേട്ടയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
