എല്‍ ഡി എഫ് സ്ഥാനാര്‍ത്ഥി പട്ടിക പ്രഖ്യാപിച്ചു; കൊല്ലത്ത് മുകേഷും അഴീക്കോട് നികേഷ് കുമാറും മത്സരിക്കും; ആറന്മുളയില്‍ വീണ ജോര്‍ജ്
ബുധന്‍, 30 മാര്‍ച്ച് 2016 (17:35 IST)
നിയമസഭ തെരഞ്ഞെടുപ്പില്‍ ഇടതുമുന്നണി മത്സരിക്കുന്ന 124 മണ്ഡലങ്ങളിലേക്കുള്ള സ്ഥാനാര്‍ത്ഥി പട്ടിക എല്‍ ഡി എഫ് കണ്‍‌വീനര്‍ വൈക്കം വിശ്വന്‍ പ്രഖ്യാപിച്ചു. ബാക്കിവരുന്ന 16 മണ്ഡലങ്ങളിലെ സ്ഥാനാര്‍ത്ഥികളെ ഉടന്‍ പ്രഖ്യാപിക്കുമെന്നും വൈക്കം വിശ്വന്‍ പറഞ്ഞു.
കേരളത്തില്‍ യു ഡി എഫ് നേതൃത്വം നടത്തുന്നത് അഴിമതി ഭരണമാണെന്ന് വൈക്കം വിശ്വന്‍ ആരോപിച്ചു. ഇപ്പോള്‍ സ്ഥാനാര്‍ത്ഥി നിര്‍ണയത്തിലെ തര്‍ക്കം എന്ന പേരില്‍ യു ഡി എഫില്‍ നടക്കുന്നത് കട്ടമുതല്‍ പങ്ക്‍വയ്ക്കുന്നതുമായി ബന്ധപ്പെട്ട തര്‍ക്കമാണ്. മന്ത്രിമാര്‍ മത്സരിച്ച അഴിമതി നടത്തുകയാണ്. അഴിമതി നടത്തിയെന്ന് കെ പി സി സി പ്രസിഡന്റ് വി എം സുധീരന് ബോധ്യമുള്ളതുകൊണ്ടാണ് ആരോപണ വിധേയര്‍ മാറി നില്‍ക്കണമെന്ന് ആവശ്യം ഉന്നയിക്കുന്നതെന്നും വൈക്കം വിശ്വന്‍ പറഞ്ഞു.
അതേസമയം, എല്‍ ഡി എഫ് സ്ഥാനാര്‍ത്ഥി പട്ടികയില്‍ കാര്യമായ മാറ്റങ്ങളൊന്നും ഉണ്ടായില്ല. പ്രതീക്ഷിച്ചതുപോലെ തന്നെ ധര്‍മ്മടത്ത് പിണറായി വിജയനും മലമ്പുഴയില്‍ വി എസ് അച്ചുതാനന്തനും കൊല്ലത്ത് നടന്‍ മുകേഷും മത്സരിക്കും. മാധ്യമ പ്രവര്‍ത്തകരായ നികേഷ് കുമാര്‍ അഴീക്കോടും, ആറന്മുളയില്‍ വീണാ ജോര്‍ജും മത്സരിക്കും. തൃപ്പൂണിത്തറയില്‍ എം സ്വരാജും പത്തനാപുരത്ത് ഗണേഷ് കുമാറും മത്സരിക്കും.
