നെടുവത്തൂര്‍ എം എല്‍ എയുടെ കാറിനുള്ളില്‍ യുവതിക്കെതിരെ ലൈംഗികപീഡനത്തിന് ശ്രമം. നെടുവത്തൂര്‍ എംഎല്‍എ ബി രാഘവന്‍റെ ഡ്രൈവര്‍ സുനിലാണ് വികലാംഗയായ യുവതിയെ പീഡിപ്പിക്കാന്‍ ശ്രമിച്ചത്.
വികലാംഗയായ യുവതി കുന്നിക്കോട് ബസ് കാത്ത് നില്‍ക്കുമ്പോള്‍ എം എല്‍ എയുടെ കാര്‍ നിര്‍ത്തുകയും ‘വീട്ടില്‍ കൊണ്ടു വിടാം’ എന്ന് ഡ്രൈവര്‍ സുനില്‍ വാഗ്ദാനം ചെയ്യുകയുമായിരുന്നു. സുനില്‍ മാത്രമേ കാറിനുള്ളില്‍ ഉണ്ടായിരുന്നുള്ളൂ. കുന്നിക്കോടുനിന്ന് പത്തനാപുരത്തേക്കുള്ള റൂട്ടില്‍ കുറച്ചുദൂരം ഓടിയ ശേഷം സുനില്‍ പെട്ടെന്ന് കാര്‍ നിര്‍ത്തുകയും യുവതിയെ കടന്നുപിടിക്കുകയുമായിരുന്നു.
ആദ്യം അമ്പരന്നുപോയ യുവതി പിന്നീട് മനസാന്നിധ്യം വീണ്ടെടുത്ത് പുറത്തേക്കോടുകയും ബഹളം വയ്ക്കുകയും ചെയ്തു. കാര്യം വഷളാകുമെന്ന് മനസിലായ സുനില്‍ കാറെടുത്ത് രക്ഷപ്പെടാന്‍ ശ്രമിച്ചെങ്കിലും നാട്ടുകാര്‍ വളഞ്ഞ് പിടിക്കുകയായിരുന്നു. പിന്നീട് സുനിലിനെ പൊലീസില്‍ ഏല്‍പ്പിച്ചു.
