പഞ്ചാബ് കിങ്‌സിനെതിരായ മത്സരശേഷം കാമുകിയോട് പ്രണയാഭ്യര്‍ഥന നടത്തിയ ചെന്നൈ സൂപ്പര്‍ കിങ്‌സ് താരം ദീപക് ചഹറാണ് ഇപ്പോള്‍ വാര്‍ത്തകളിലെ താരം. നേരത്തെ പ്ലാന്‍ ചെയ്തത് അനുസരിച്ചാണ് സ്റ്റേഡിയത്തില്‍വച്ച് കാമുകി ജയ ഭരദ്വാജിനെ ചഹര്‍ പ്രൊപ്പോസ് ചെയ്തത്. മോതിരം കൈമാറിയ ശേഷം ഇരുവരും ആലിംഗനം ചെയ്തു. മത്സരശേഷം ഇങ്ങനെയൊരു കാര്യം സ്റ്റേഡിയത്തില്‍ നടക്കുമെന്ന് ചെന്നൈ സൂപ്പര്‍ കിങ്‌സ് നായകന്‍ എം.എസ്.ധോണിക്കും അറിയാമായിരുന്നു. ധോണിയുടെ അനുമതി ലഭിച്ച ശേഷമാണ് ചഹറിന്റെ പ്രണയാഭ്യര്‍ഥന നടക്കുന്നത്.
പ്ലേ ഓഫ് മത്സരങ്ങള്‍ക്കിടെ പ്രണയാഭ്യര്‍ഥന നടത്താനായിരുന്നു ദീപക് ചഹറിന്റെ താല്‍പര്യം. എന്നാല്‍, ധോണി ഇതിനു എതിരായിരുന്നു. ലീഗ് പോരാട്ടത്തിലെ അവസാന മത്സരത്തില്‍ ആകാമെന്ന് ധോണി പറഞ്ഞു. അങ്ങനെയാണ് പ്ലേ ഓഫ് മത്സരം വരെ കാത്തിരിക്കേണ്ട അവസ്ഥ വരാതിരുന്നത്. ദീപക് ചഹറിന്റെ വീട്ടുകാര്‍ക്കും ഇതേ കുറിച്ച് അറിയാമായിരുന്നു.
