അമേരിക്കയിലെ കൊളൊറാഡൊയില്‍ പള്ളികളുമായി ബന്ധപ്പെട്ട ഞായറാഴ്ച രാവിലെയുണ്ടായ രണ്ട് വെടിവെപ്പ് സംഭവങ്ങളിലായി മൂന്നു പേര്‍ മരിക്കുകയും ആറു പേര്‍ക്ക് പരുക്കേല്‍ക്കുകയും ചെയ്തു.
കൊളൊറാഡൊയിലെ ന്യൂ ലൈഫ് ഇവാന്‍‌ജലിക്കല്‍ പള്ളിയുടെ പാര്‍ക്കിങ് സ്ഥലത്തു വച്ച് കറുത്തവസ്ത്രം ധരിച്ചെത്തിയ അക്രമി വെടിയുതിര്‍ക്കുകയായിരുന്നെന്ന് ദൃക്‌സാക്ഷി പറഞ്ഞു. ആക്രമണത്തില്‍ നാലുപേര്‍ക്ക് മുറിവേറ്റതായി പൊലീസ് അറിയിച്ചു.
പൊലീസ് സംഭവസ്ഥലത്ത് എത്തുന്നതിനു മുമ്പു തന്നെ പള്ളിയിലെ സുരക്ഷാ ജീവനക്കാരന്‍ അക്രമിയെ വെടിവച്ചു കൊന്നു. അക്രമിയെ തിരിച്ചറിയാന്‍ കഴിഞ്ഞിട്ടില്ല. ആക്രമണം നടക്കുമ്പോള്‍ ഏഴായിരത്തോളം പേര്‍ പള്ളി മന്ദിരത്തില്‍ ഉണ്ടായിരുന്നു.
ഡെന്‍വറിലെ അര്‍വാദയിലുള്ള ക്രിസ്ത്യന്‍ മിഷനറി പരിശീലന കേന്ദ്രത്തിനടുത്ത് വച്ചാണ് മറ്റൊരു അക്രമി രണ്ടു മിഷനറികളെ വെടിവച്ചു കൊല്ലുകയും രണ്ടു പേരെ മുറിവേല്‍പ്പിക്കുകയും ചെയ്തത്. അര്‍വാദയിലെ തോക്കുധാരിയും കറുത്ത വേഷമണിഞ്ഞാണ് എത്തിയത്. രണ്ട് അക്രമ സംഭവങ്ങളെ കുറിച്ചും പൊലീസ് വിശദമായ അന്വേഷണം ആരംഭിച്ചിട്ടുണ്ട്.
