കനല്‍ കഴിഞ്ഞാല്‍ ലീഗല്‍ ത്രില്ലറുമായി അനൂപ് മേനോന്‍

ഇപ്പോള്‍ ‘കനല്‍’ എന്ന മോഹന്‍ലാല്‍ ചിത്രത്തിലാണ് അനൂപ് മേനോന്‍ അഭിനയിച്ചുകൊണ്ടിരിക്കുന്നത്. എം പദ്മകുമാര്‍ സംവിധാനം ചെയ്യുന്ന ‘കനല്‍’ ഒരു റിവഞ്ച് സ്റ്റോറിയാണ്. നായകതുല്യമായ കഥാപാത്രത്തെയാണ് അനൂപ് അവതരിപ്പിക്കുന്നത്.

കനലിന് ശേഷം അനൂപ് മേനോന്‍ വീണ്ടും തന്‍റെ തിരക്കഥാരചനാ ജോലികളിലേക്ക് കടക്കും. എം പദ്മകുമാറിനുവേണ്ടിയാണ് അടുത്ത തിരക്കഥ. അത് ഒരു ലീഗല്‍ ത്രില്ലറായിരിക്കും. അനൂപ് മേനോന്‍ തന്നെയാണ് ചിത്രത്തിലെ നായകനാകുന്നത്.

ഒരു അഭിഭാഷകനായാണ് അനൂപ് മേനോന്‍ ഈ സിനിമയില്‍ അഭിനയിക്കുന്നത്. യഥാര്‍ത്ഥ ജീവിതത്തിലും അനൂപ് ഒരു അഭിഭാഷകനാണ്. "ചിത്രത്തിന്‍റെ ആദ്യ രംഗങ്ങള്‍ എന്‍റെ കോളജ് ജീവിതത്തില്‍നിന്നുതന്നെ എടുത്തിട്ടുള്ളതാണ്” - അനൂപ് പറയുന്നു.

പ്രിയദര്‍ശനുവേണ്ടിയും അനൂപ് മേനോന്‍ ഒരു തിരക്കഥ എഴുതുന്നുണ്ട്. പാവാട, പാവ, മാല്‍ഗുഡി ഡെയ്സ്, ആക്ഷന്‍ ഹീറോ ബിജു തുടങ്ങിയവയാണ് അനൂപ് മേനോന്‍റെ അടുത്ത പ്രൊജക്ടുകള്‍.

റോക്ക് ന്‍ റോള്‍, പ്രണയം, ഗ്രാന്‍ഡ് മാസ്റ്റര്‍ തുടങ്ങിയ സിനിമകള്‍ക്ക് ശേഷം മോഹന്‍ലാലിനൊപ്പം അനൂപ് മേനോന്‍ അഭിനയിക്കുന്ന ചിത്രമാണ് കനല്‍. എസ് സുരേഷ്ബാബുവാണ് സിനിമയുടെ തിരക്കഥ.