സിനിമയിലെത്തി തുടക്കകാലത്ത് തന്നെ നിരവധി ഹിറ്റ് സിനിമകളില്‍ അഭിനയിക്കാന്‍ ഭാഗ്യം ലഭിച്ച താരമാണ് മഞ്ജു വാര്യര്‍. മോഹന്‍ലാല്‍-മഞ്ജു വാര്യര്‍ കൂട്ടുകെട്ട് മലയാള സിനിമയില്‍ വന്‍ ഹിറ്റായിരുന്നു. എന്നാല്‍, മഞ്ജു വാര്യര്‍ക്ക് അഭിനയിക്കാന്‍ സാധിക്കാതെ പോയ ചില മോഹന്‍ലാല്‍ ചിത്രങ്ങളുണ്ട്. മോഹന്‍ലാലിന്റെ നായികയായി സംവിധായകന്‍ മഞ്ജുവിനെ തീരുമാനിക്കുകയും എന്നാല്‍ ചില കാരണങ്ങളാല്‍ മുടങ്ങി പോകുകയും ചെയ്ത സിനിമയാണ് ഇത്.
സിനിമ ഏതാണെന്ന് ആലോചിച്ച് തല പുകയ്‌ക്കേണ്ട. പ്രിയദര്‍ശന്‍ സംവിധാനം ചെയ്ത് മോഹന്‍ലാലും ശ്രീനിവാസനും തകര്‍ത്തഭിനയിച്ച ചന്ദ്രലേഖയാണ് അത്. ചന്ദ്രലേഖയിലേക്ക് തന്നെ പരിഗണിക്കാന്‍ സംവിധായകന്‍ പ്രിയദര്‍ശന്‍ ആലോചിച്ചിരുന്ന കാര്യം ഈ അടുത്താണ് മഞ്ജു അറിഞ്ഞത് തന്നെ. മരയ്ക്കാര്‍ അറബിക്കടലിന്റെ സിംഹം എന്ന ചിത്രത്തിന്റെ ഷൂട്ടിങ് സമയത്താണ് പ്രിയദര്‍ശന്‍ മഞ്ജുവിനോട് ഇക്കാര്യം പറഞ്ഞത്. 'ചന്ദ്രലേഖ'യില്‍ പൂജ ബത്ര അവതരിപ്പിച്ച ലേഖ എന്ന കഥാപാത്രത്തിലേക്കാണ് മഞ്ജുവിനെ ആലോചിച്ചിരുന്നത്. എന്നാല്‍, മഞ്ജുവിനെ ബന്ധപ്പെടാന്‍ സാധിക്കാതെ വന്നപ്പോള്‍ ആണ് പൂജയെ തീരുമാനിച്ച് ഷൂട്ടിങ് ആരംഭിച്ചത്. ഫാസില്‍ നിര്‍മിച്ച ചന്ദ്രലേഖയില്‍ നെടുമുടി വേണു, ഇന്നസെന്റ്, സുകന്യ, സുകുമാരി, കൊച്ചിന്‍ ഹനീഫ തുടങ്ങി വന്‍ താരനിര അണിനിരന്നു. തിയറ്ററുകളില്‍ സൂപ്പര്‍ഹിറ്റായ ചിത്രത്തില്‍ തന്നെ ആദ്യം പരിഗണിച്ചിരുന്ന കാര്യം അറിഞ്ഞപ്പോള്‍ മഞ്ജു വാര്യര്‍ക്ക് വലിയ നിരാശ തോന്നി.
