മോഹന്‍ലാല്‍ ചെയ്യുന്നത് നായരും മേനോനും മാത്രമല്ല, സോഷ്യല്‍ മീഡിയയില്‍ പൊങ്കാല, ആഷിക് അബുവിനോട് മോഹന്‍ലാല്‍ ആരാധകര്‍ ‘പ്രതികാരം’ ചെയ്യുന്ന വിധം!
മഹേഷിന്‍റെ പ്രതികാരം ഒരു മികച്ച സിനിമ എന്ന പേരുനേടി മുന്നേറുകയാണ്. ആഷിക് അബു നിര്‍മ്മിച്ച്, ദിലീഷ് പോത്തന്‍ സംവിധാനം ചെയ്ത ഈ ഫഹദ് ഫാസില്‍ ചിത്രം ഇതിനകം തന്നെ ഹിറ്റ് ചാര്‍ട്ടില്‍ ഇടം‌പിടിച്ചുകഴിഞ്ഞു. എന്നാല്‍ പടം വിജയിക്കുന്നതിനൊപ്പം ഒരു വിവാദവും വളരുകയാണ്. സിനിമ മോഹന്‍ലാലിനെ അധിക്ഷേപിച്ചു എന്ന ആരോപണവുമായി മോഹന്‍ലാല്‍ ആരാധകര്‍ രംഗത്തെത്തി.
ചിത്രത്തില്‍ സൌബിന്‍ ഷാഹിര്‍ പറയുന്ന ഒരു ഡയലോഗാണ് വിവാദമായിരിക്കുന്നത്. “ഞാന്‍ ലാലേട്ടന്‍റെ ഫാനാ. കാരണം മമ്മുക്ക എല്ലാ ടൈപ്പ് വേഷവും ചെയ്യും. പൊലീസ്, രാജാവ്, പൊട്ടന്‍ എല്ലാം... പക്ഷേ ലാലേട്ടന്‍ നായര്‍, മേനോന്‍, പ്രമാണി ഇതുവിട്ടൊരു കളിയില്ല” - എന്ന ഡയലോഗാണ് മോഹന്‍ലാല്‍ ആരാധകരെ ചൊടിപ്പിച്ചിരിക്കുന്നത്. ആഷിക് അബുവിന്‍റേ സോഷ്യല്‍ മീഡിയ പേജില്‍ മോഹന്‍ലാല്‍ ആരാധകര്‍ പൊങ്കാലയിടുകയാണ്.
