മമ്മൂട്ടി ആരാധകരെ ആവേശത്തിലാഴ്ത്തുന്ന വാര്‍ത്തകളാണ് പുറത്തുവരുന്നത്. ഗ്രേറ്റ് ഫാദര്‍ എന്ന ബംബര്‍ ഹിറ്റിനു ശേഷം സംവിധായകന്‍ ഹനീഫ് അദേനിയും മമ്മൂട്ടിയും ഒന്നിക്കുന്നുവെന്ന് നേരത്തേ റിപ്പോര്‍ട്ടുകള്‍ ഉണ്ടായിരുന്നു. എന്നാല്‍, പുറത്തുവരുന്ന റിപ്പോര്‍ട്ടുകള്‍ അനുസരിച്ച് ഹനീഫ് അദേനി സംവിധായകനായിട്ടല്ല തിരക്കഥകൃത്തായിട്ടാണ് എത്തുന്നത്.
ഷാജി പാടൂര്‍ സംവിധാനം ചെയ്യുന്ന ‘അബ്രഹാമിന്റെ സന്തതികള്‍’ എന്ന് പേരിട്ടിരിക്കുന്ന ചിത്രത്തിന്റെ തിരക്കഥ ഒരുക്കുന്നത് ഹനീഫ് അദേനി ആണ്. 22 വര്‍ഷം സിനിമ മേഖലയില്‍ പ്രവര്‍ത്തിച്ച ഷാജിയുടെ ആദ്യ സംവിധാന സംരംഭമാണ് ‘അബ്രഹാമിന്റെ സന്തതികള്‍’. കസബ എന്ന ചിത്രത്തിനു ശേഷം മമ്മൂട്ടി കാക്കിയണിയുന്നു എന്ന പ്രത്യേകതയും ഈ ചിത്രത്തിനുണ്ട്.
ഡെറിക് അബ്രഹാം എന്ന പൊലീസ് ഉദ്യോഗസ്ഥനായിട്ടാണ് മമ്മൂട്ടി ചിത്രത്തില്‍ എത്തുന്നത്. ‘ഒരു പൊലീസ് കഥ’ എന്ന ടാഗ്‌ലൈനോടു കൂടി ഒരുങ്ങുന്ന ചിത്രത്തിന്റെ ഷൂട്ടിങ് ഉടന്‍ ആരംഭിക്കും. മുന്‍ചിത്രങ്ങളില്‍ നിന്നും വ്യത്യസ്തമായ വേഷമാണ് മമ്മൂട്ടിയുടെതെന്ന് ഹനീഫ് അദേനി പറയുന്നു. ഗുഡ് വില്‍ എന്റര്‍ടെയ്ന്‍മെന്റ്‌സിന്റെ ബാനറില്‍ ജോബി ജോര്‍ജ്ജാണ് നിര്‍മ്മാണം.
