കേരളത്തില്‍ തെരുവുനായ്ക്കളെ കൊല്ലരുത്, തമിഴ് നടന്‍ വിശാല്‍ നിരാഹാരസമരത്തിന് !

കേരളത്തില്‍ തെരുവുനായ്ക്കളെ കൊല്ലുന്നതിനെതിരെ ലോകവ്യാപകമായി പ്രതിഷേധം അരങ്ങേറുകയാണ്. കേരളത്തില്‍ കൂട്ടമായി തെരുവുനായ്ക്കളെ കൊന്നൊടുക്കുന്നു എന്ന് പ്രചരണമുണ്ടായതോടെ പ്രതിഷേധം പല രൂപത്തില്‍ അലയടിക്കുകയാണ്. ഓണ്‍‌ലൈന്‍ പ്രതിഷേധങ്ങള്‍ തുടരുന്നതിനിടെ പലയിടത്തും പ്രതിഷേധ പ്രകടനങ്ങള്‍ നടന്നു.

തമിഴ് ചലച്ചിത്രതാരം വിശാല്‍ ഒരുപടികൂടി കടന്നുള്ള പ്രതിഷേധത്തിനാണ് ഒരുങ്ങുന്നത്. കേരളത്തില്‍ നായ്ക്കളെ കൊല്ലുന്നതിനെതിരെ ജൂലൈ 25ന് വിശാല്‍ നിരാഹാര സമരം നടത്തുകയാണ്. ചെന്നൈ വള്ളുവര്‍ക്കോട്ടമാണ് സമരവേദി.

വിശാലിന് ഐക്യദാര്‍ഢ്യം പ്രഖ്യാപിച്ചുകൊണ്ട് അനവധി സംഘടനകളും രംഗത്തെത്തിയിട്ടുണ്ട്. ഈ സംഘടനകളുടെ പ്രതിനിധികളും 25ന് നിരാഹാരം അനുഷ്ഠിക്കുമെന്നാണ് വിവരം.

ഇതോടൊപ്പം ഒരു ഒപ്പുശേഖരിക്കല്‍ കാമ്പയിനും വിശാല്‍ സംഘടിപ്പിച്ചിട്ടുണ്ട്. നായ്ക്കളെ കൊല്ലരുതെന്ന് ആവശ്യപ്പെട്ടുകൊണ്ടുള്ള കത്തില്‍ ലക്ഷക്കണക്കിന് പേരുടെ ഒപ്പുശേഖരിച്ച് കേരളത്തിന്‍റെ മുഖ്യമന്ത്രിക്കും ഗവര്‍ണര്‍ക്കും നിയമമന്ത്രിക്കും അയയ്ക്കാനാണ് വിശാലിന്‍റെ തീരുമാനം.