ധോണിക്കു മുമ്പില്‍ മെസിയും ക്രിസ്‌റ്റ്യാനോയും ഒന്നുമല്ല; ഏറ്റവും കൂടുതല്‍ ആരാധകരുള്ളത് മഹിക്കെന്ന് സര്‍വ്വേ
വെള്ളി, 27 ജൂലൈ 2018 (13:12 IST)
നായകസ്ഥാനം വിരാട് കോഹ്‌ലിക്ക് കൈമാറിയിട്ടും മഹേന്ദ്ര സിംഗ് ധോണിയുടെ ജനപ്രീതിയില്‍ ഇടിവുണ്ടായിട്ടില്ലെന്ന് സര്‍വ്വേ ഫലം. ക്രിക്കറ്റ് ഇതിഹാസം സച്ചിന്‍ തെന്‍‌ഡുല്‍ക്കറെ മറികടന്ന് ഇന്ത്യയിൽ ഏറ്റവും കൂടുതൽ ആരാധകരുള്ള കായികതാരമായി ധോണിയെ തിരഞ്ഞെടുത്തു.
നാൽപ്പത് ലക്ഷത്തിലേറെപ്പേർ പങ്കെടുത്ത വോട്ടെടുപ്പിൽ 6.8 ശതമാനം വോട്ടുകള്‍ സച്ചിന്‍ നേടിയപ്പോള്‍ 7.7 ശതമാനം വോട്ടുകളാണ് ധോണിക്ക് വീണത്. ടീം ഇന്ത്യയുടെ ക്യാപ്‌റ്റനായ കോഹ്‌ലി 4.8 ശതമാനം മാത്രം നേടി മൂന്നാം സ്ഥാനത്തേക്ക് പിന്തള്ളപ്പെട്ടു.
ഇവര്‍ക്കുശേഷം ഇന്ത്യയില്‍ ഏറ്റവും കൂടുതല്‍ ആരാധകരുള്ളത് പോര്‍ച്ചുഗല്‍ താരം ക്രിസ്‌റ്റ്യാനോ റൊണാള്‍ഡോയ്‌ക്കും ആരാധകരുടെ പ്രിയതാരമായ ലയണല്‍ മെസിക്കുമാണ്. 2.6 ശതമാനം വോട്ട് യുവന്റസ് താരം നേടിയപ്പോള്‍ അര്‍ജന്റീന താരം രണ്ട് ശതമാനം വേട്ട് സ്വന്തമാക്കി.
1.6 ശതമാനം വോട്ടുമായി ഇംഗ്ലണ്ടിന്റെ സൂപ്പര്‍താരം ഡേവിഡ് ബെക്കാമും പട്ടികയില്‍ ഇടം നേടി.
രണ്ടു ലോകകപ്പുകളും ഒരു ചാമ്പ്യന്‍‌സ് ട്രോഫിയും ഇന്ത്യക്ക് സമ്മാനിച്ചതാണ് ധോണിയെ നമ്പര്‍ വണ്‍ ആക്കി തീര്‍ക്കുന്നത്. കൂടാതെ ഐ സി സി ടെസ്റ്റ് റാങ്കിംഗില്‍ ടീമിനെ ഒന്നാമതെത്തിച്ചതും മഹിയാണ്. ഈ നേട്ടങ്ങള്‍ മറ്റുള്ളവര്‍ക്ക് നെടാന്‍ കഴിയാത്തതാണ് മുന്‍ നായകനെ എല്ലാവരുടെയും ഇഷ്‌ടതാരമാക്കുന്നത്.
