എല്ലാത്തിനു അതിന്റേതായ സമയമുണ്ടെന്ന് പറയുന്നത് ശരിയാണ്. നീണ്ട ഇടവേളയ്ക്ക് ശേഷം ഉദയ പിക്ചേഴ്സ് തിരികെയെത്തുന്നു. സമയം തെളിയിക്കാൻ. അതും ഒരു ഒന്നൊന്നര ചിരിയുടെ അമിട്ടുമായി. സിദ്ധാർത്ഥ ശിവ സംവിധാനം ചെയ്ത് കുഞ്ചാക്കോ ബോബൻ നായകനാകുന്ന കൊച്ചൗവ്വ പൗലോ അയ്യപ്പ കൊയ്‌ലോ എന്ന ചിത്രത്തിന്റെ ടീസർ പുറത്തിറങ്ങി. കോമഡിയാണ് ചിത്രത്തിന്റെ അടിത്തറ.
കുഞ്ചാക്കോ ബോബനൊപ്പം നടന്‍ സുധീഷിന്റെ മകന്‍ രുദ്രാഷും പ്രധാനകഥാപാത്രത്തെ അവതരിപ്പിക്കുന്നു. നാട്ടിലെ സകലപ്രശ്‌നങ്ങളിലും ഇടപെടുന്ന തനി ഗ്രാമീണനായ കൊച്ചൗവ്വ എന്ന യുവാവിന്റെ ജീവിതത്തെയാണ് ചിത്രം പറയുന്നത്. പ്രശസ്ത ബ്രസീലിയന്‍ സാഹിത്യകാരന്‍ പൗലോ കൊയ്‌ലോയുടെ ആല്‍കെമിസ്റ്റ് എന്ന പുസ്തകവും അദ്ദേഹത്തിന്റെ വാക്കുകളും കൊച്ചൗവ്വയുടെ ജീവിതത്തിലേക്കും കടന്നുചെല്ലുന്നുണ്ട്. സിദ്ധാര്‍ത്ഥ് ശിവ തന്നെയാണ് ചിത്രത്തിന്റെ രചനയും നിർവഹിച്ചിരിക്കുന്നത്.
