മഹാഭാരതത്തിലെ ഭീഷ്മരെ ഓര്‍മിപ്പിക്കുന്ന വിധമാണ് മമ്മൂട്ടിയുടെ മൈക്കിള്‍ എന്ന കഥാപാത്രത്തെ സിനിമയിലുടനീളം ബില്‍ഡ് ചെയ്തിരിക്കുന്നത്. സ്വന്തം പിതാവിന് വേണ്ടി ജീവിക്കുന്ന ഭീഷ്മരെയാണ് മഹാഭാരതത്തില്‍ വരച്ചുകാണിക്കുന്നത്. ഭീഷ്മ പര്‍വ്വത്തിലെ മൈക്കിളും അതിനു സമാനമാണ്. പിതാവിന്റെ മരണ സമയത്തെ ആഗ്രഹങ്ങളും സ്വപ്‌നങ്ങളും മാത്രം മനസ്സില്‍ കൊണ്ടുനടക്കുന്ന മൈക്കിള്‍. അപ്പന്‍ പറഞ്ഞ കാര്യങ്ങള്‍ മാത്രം കുടുംബത്തില്‍ നടക്കണമെന്ന് ആഗ്രഹിക്കുന്ന മൈക്കിള്‍.
സ്വന്തം ഇച്ഛ പ്രകാരം മാത്രമേ മരിക്കാന്‍ സാധിക്കൂ എന്ന വരം ഭീഷ്മര്‍ക്ക് ലഭിച്ചിരുന്നു. ഭീഷ്മ പര്‍വ്വത്തില്‍ മൈക്കിള്‍ സമാനമായ ഒരു ഡയലോഗ് സ്വന്തം സഹോദരനോട് പറയുന്ന ഭാഗമുണ്ട്. നിങ്ങള്‍ക്ക് എന്റെ മരണത്തിനായി ശ്രമിക്കാം, പക്ഷേ അതിനു ഞാന്‍ കൂടി തീരുമാനിക്കണം എന്നാണ് മൈക്കിള്‍ പറയുന്നത്.
