ബിഗ് ബജറ്റ് ആക്ഷന്‍ ത്രില്ലറുകളുടെ സംവിധായകന്‍ എ ആര്‍ മുരുഗദോസ് വീണ്ടും ഹിന്ദിയിലേക്ക്. പുതിയ തമിഴ് ചിത്രമായ ‘ഏഴാം അറിവ്’ പൂര്‍ത്തിയായ ശേഷം ഹിന്ദി ചിത്രം ആരംഭിക്കും. ഇതിന്‍റെ തിരക്കഥ പൂര്‍ത്തിയായിക്കഴിഞ്ഞു. മെഗാഹിറ്റായ ‘ഗജിനി’ക്ക് ശേഷം മുരുഗദോസ് സംവിധാനം ചെയ്യുന്ന ഹിന്ദിച്ചിത്രത്തില്‍ അക്ഷയ് കുമാറാണ് നായകന്‍.
200 കോടിയിലധികമാണ് ഗജിനി എന്ന ഹിന്ദിച്ചിത്രം വാരിക്കൂട്ടിയത്. ഇതോടെ ബോളിവുഡ് നിര്‍മ്മാതാക്കള്‍ക്ക് ഏറെ പ്രിയങ്കരനായ സംവിധായകനായി മുരുഗദോസ് മാറുകയായിരുന്നു.
എന്തായാലും അദ്ദേഹത്തിന്‍റെ രണ്ടാമത്തെ ഹിന്ദിച്ചിത്രം നിര്‍മ്മിക്കുന്നത് വിപുല്‍ ഷായാണ്. ഗജിനിയേക്കാള്‍ വലിയൊരു ആക്ഷന്‍ ചിത്രത്തിനാണ് മുരുഗദോസ് ഈ ചിത്രത്തിലൂടെ ശ്രമിക്കുന്നത്. അതിനുവേണ്ടിയാണ് ആക്ഷന്‍ കിംഗായ അക്ഷയ് കുമാറിനെ നായകനാക്കിയതും.
ആക്ഷന്‍ രംഗങ്ങള്‍ക്കു വേണ്ടി മാത്രം 25 കോടി രൂപ ചെലവഴിക്കാനാണ് വിപുല്‍ ഷാ തീരുമാനിച്ചിരിക്കുന്നത്. “ഇത് ഒരു റീമേക്ക് ചിത്രമല്ല. ഒറിജിനലാണ്. ഗജിനി പോലെ തന്നെ ഈ സിനിമയും അടിസ്ഥാനപരമായി ഒരു ലവ് സ്റ്റോറിയാണ്. ശക്തമായ ആക്ഷന്‍ പശ്ചാത്തലം ഉണ്ടെന്ന് മാത്രം” - എ ആര്‍ മുരുഗദോസ് പറഞ്ഞു.
