‘നേരം’ മലയാളത്തിലും തമിഴിലും ഹിറ്റാക്കിയ സംവിധായകനാണ് അല്‍ഫോണ്‍സ് പുത്രന്‍. അദ്ദേഹം വീണ്ടും മലയാളത്തില്‍ ഒരു സിനിമയുമായി സഹകരിക്കുന്നു. മമ്മൂട്ടിയാണ് ചിത്രത്തിലെ നായകന്‍.
ആഷിക് അബു സംവിധാനം ചെയ്യുന്ന ‘ഗ്യാംഗ്സ്റ്റര്‍’ എന്ന മമ്മൂട്ടിച്ചിത്രത്തിന്‍റെ എഡിറ്റര്‍ അല്‍ഫോണ്‍സ് പുത്രനാണ്. ആഷിക് അബുവാണ് ഇക്കാര്യം അറിയിച്ചത്. ഈ ചിത്രത്തിന്‍റെ ഷൂട്ടിംഗ് ഒക്ടോബറില്‍ ആരംഭിക്കുകയാണ്.
മമ്മൂട്ടി വീണ്ടും അധോലോക നായകനാകുന്ന ചിത്രമാണ് ഗ്യാംഗ്സ്റ്റര്‍. അക്ബര്‍ അലി ഖാന്‍ എന്നാണ് മമ്മൂട്ടിയുടെ കഥാപാത്രത്തിന്‍റെ പേര്. കാസര്‍കോട് സ്വദേശിയായ അധോലോകനായകനായാണ് മമ്മൂട്ടി വരുന്നത്. റിമ കല്ലിങ്കലായിരിക്കും നായിക എന്നറിയുന്നു.
ഇപ്പോഴത്തെ ഹോട്ട് പ്രോപ്പര്‍ട്ടിയായ ഫഹദ് ഫാസില്‍ ഈ സിനിമയില്‍ ഒരു തകര്‍പ്പന്‍ കഥാപാത്രത്തെ അവതരിപ്പിക്കും. ‘ടാ തടിയാ’ ഫെയിം ശേഖര്‍ മേനോനും ചിത്രത്തില്‍ അഭിനയിക്കുന്നുണ്ട്. തമിഴ് നടന്‍ പാര്‍ത്ഥിപന്‍, രോഹിണി ഹട്ടങ്കടി എന്നിവരുടെ സാന്നിധ്യവും ഗ്യാംഗ്സ്റ്ററിന്‍റെ ആകര്‍ഷണഘടകങ്ങളാണ്.
അടുത്ത പേജില്‍ - മമ്മൂട്ടിയുടെ ഏറ്റവും സ്റ്റൈലിഷ് അവതാരം!
PRO
സോള്‍ട്ട് ആന്‍റ് പെപ്പറിലെ കെ ടി മിറാഷ് എന്ന കഥാപാത്രത്തെ അനശ്വരനാക്കിയ അഹമ്മദ് സിദ്ദിഖ് എന്ന നടനാണ് ഗ്യാംഗ്സ്റ്ററിന്‍റെ തിരക്കഥ രചിച്ചിരിക്കുന്നത്. ആഷിക് അബുവിന്‍റെ സ്ഥിരം തിരക്കഥാകൃത്തായ അഭിലാഷ് എസ് നായരും തിരക്കഥാചരനയില്‍ സഹകരിക്കുന്നുണ്ട്.
ആഷിക് അബുവിന്‍റെ രണ്ടാമത്തെ മമ്മൂട്ടിച്ചിത്രമാണ് ഗ്യാംഗ്സ്റ്റര്‍. ആദ്യചിത്രമായ ‘ഡാഡി കൂള്‍’ പരാജയമായിരുന്നു. എന്നാല്‍ ആഷിക് അബു എന്ന സംവിധായകനെ അങ്ങനെ വിട്ടുകളയാന്‍ മമ്മൂട്ടി ഒരുക്കമായിരുന്നില്ല. നല്ല ഒരു ആക്ഷന്‍ കഥയുമായി വീണ്ടും വരാന്‍ മമ്മൂട്ടി നിര്‍ദ്ദേശിച്ചു. ഗ്യാംഗ്സ്റ്ററിന്‍റെ കഥ പറഞ്ഞപ്പോള്‍ തന്നെ ആഷിക് അബുവിന് മമ്മൂട്ടി കൈകൊടുത്തു.
മലയാള സിനിമയിലെ ഏറ്റവും സ്റ്റൈലിഷ് ആയ അധോലോകചിത്രമാക്കി ഗ്യാംഗ്സ്റ്ററിനെ മാറ്റാനുള്ള ഒരുക്കത്തിലാണ് ആഷിക് അബു. ചിത്രത്തിലെ നായികയെ തീരുമാനിച്ചിട്ടില്ല.
അതിരാത്രം, സാമ്രാജ്യം, പരമ്പര, ബിഗ്‌ബി, ഭാര്‍ഗവചരിതം മൂന്നാം ഖണ്ഡം, ബല്‍‌റാം വേഴ്സസ് താരാദാസ് തുടങ്ങിയ സിനിമകളിലാണ് മുമ്പ് മമ്മൂട്ടി അധോലോക നായകന്‍റെ വേഷം കെട്ടിയത്. ഇതില്‍ അതിരാത്രവും സാമ്രാജ്യവും സൂപ്പര്‍ഹിറ്റുകളായിരുന്നു. ബിഗ്‌ബി ആവറേജ് ഹിറ്റും.
എന്തായാലും വീണ്ടും ഒരു അധോലോക കഥ മമ്മൂട്ടി തെരഞ്ഞെടുക്കുമ്പോള്‍ ഒരു മെഗാഹിറ്റില്‍ കുറഞ്ഞൊന്നും അദ്ദേഹം പ്രതീക്ഷിക്കുന്നില്ല. ആഷിക് അബു മമ്മൂട്ടിയുടെ പ്രതീക്ഷ കാക്കുമെന്ന് കരുതാം. കുറച്ചു വര്‍ഷങ്ങള്‍ക്ക് മുമ്പ് ഗ്യാംഗ്സ്റ്റര്‍ എന്ന പേരില്‍ വന്ന ഒരു ഹിന്ദിച്ചിത്രം സൂപ്പര്‍ഹിറ്റായിരുന്നു.
