ദിലീപ് പരസ്യചിത്ര സംവിധായകന്‍ - ഏഴ് സുന്ദര രാത്രികള്‍ !
ബുധന്‍, 18 ജൂലൈ 2012 (20:44 IST)
PRO
2006 ഓഗസ്റ്റ് 25നാണ് ക്ലാസ്മേറ്റ്സ് എന്ന സിനിമ കേരളത്തിലെ തിയേറ്ററുകളില്‍ റിലീസ് ചെയ്തത്. ജയിംസ് ആല്‍ബര്‍ട്ടിന്‍റെ തിരക്കഥയില്‍ ലാല്‍ ജോസ് സംവിധാനം ചെയ്ത ചിത്രം ചരിത്രവിജയമാണ് നേടിയത്. തൊണ്ണൂറുകളിലെ കോളജ് കാമ്പസുകളുടെ ഗൃഹാതുരതയുണര്‍ത്തിയ സിനിമ കേരളം ഏറ്റെടുക്കുകയായിരുന്നു.
അതിന് ശേഷം ജയിംസ് ആല്‍ബര്‍ട്ട് സൈക്കിള്‍, ഇവിടം സ്വര്‍ഗമാണ്, വെനീസിലെ വ്യാപാരി, ജവാന്‍ ഓഫ് വെള്ളിമല എന്നീ തിരക്കഥകള്‍ രചിച്ചു. എന്നാല്‍ ലാല്‍ ജോസുമൊന്നിച്ച് ഒരു ചിത്രം ജയിംസ് ചെയ്തില്ല. ഇപ്പോഴിതാ, ലാല്‍ ജോസ് - ജയിംസ് ആല്‍ബര്‍ട്ട് ടീമിന്‍റെ പുതിയ സിനിമയുടെ വിവരങ്ങള്‍ ലഭിക്കുന്നു.
‘ഏഴ് സുന്ദരരാത്രികള്‍’ എന്നാണ് സിനിമയ്ക്ക് പേരിട്ടിരിക്കുന്നത്. ദിലീപ് ഈ ചിത്രത്തില്‍ പരസ്യ സംവിധായകനായി അഭിനയിക്കുന്നു. നായികയെ തീരുമാനിച്ചിട്ടില്ല. വിവാഹത്തിന് തൊട്ടുമുമ്പുള്ള ഏഴ് ദിവസങ്ങളിലെ ഒരു യുവാവിന്‍റെ ജീവിതമാണ് ചിത്രത്തിന്‍റെ പ്രമേയം.
“ഇത് സ്ലാപ്സ്റ്റിക് കോമഡികള്‍ നിറഞ്ഞ ഒരു ടിപ്പിക്കല്‍ ദിലീപ് ചിത്രമല്ല. എന്നാല്‍ ഇതൊരു എന്‍റര്‍ടെയ്നറായിരിക്കും എന്ന് ഉറപ്പിച്ചുപറയാം” - ജയിംസ് ആല്‍ബര്‍ട്ട് പറയുന്നു.
ലാല്‍ ജോസ് ഇപ്പോള്‍ പൃഥ്വിരാജിനെ നായകനാക്കി ‘അയാളും ഞാനും തമ്മില്‍’ എന്ന ചിത്രത്തിന്‍റെ തിരക്കിലാണ്. അതിന് ശേഷം മമ്മൂട്ടിയെ നായകനാക്കി ‘ഇമ്മാനുവല്‍’ എന്ന പ്രൊജക്ട് ആരംഭിക്കും. ആ ചിത്രം പൂര്‍ത്തിയായതിന് ശേഷമേ ‘ഏഴ് സുന്ദരരാത്രികള്‍’ ചിത്രീകരണം തുടങ്ങുകയുള്ളൂ.
ചന്ദ്രനുദിക്കുന്ന ദിക്കില്‍, മീശമാധവന്‍, രസികന്‍, ചാന്തുപൊട്ട്, മുല്ല, സ്പാനിഷ് മസാല എന്നിവയാണ് ദിലീപും ലാല്‍ ജോസും ഒരുമിച്ച ചിത്രങ്ങള്‍.
