മലയാള നാടക - സിനിമാ രംഗത്തെ പ്രതിഭാശാലികളില് ഒരാളാണ് എസ്.എല്.പുരം സദാനന്ദന്. കമ്യൂണിസത്തിലൂടെ നാടക സമിതിയിലേക്കും പിന്നെ തിരക്കഥാ രചനയിലേക്കും എത്തിയ സദാനന്ദന് ഈ രംഗങ്ങളിലെല്ലാം മികവ് പുലര്ത്തി. മലയാളത്തിന് ആദ്യ സ്വര്ണമെഡല് നേടിത്തന്ന ചെമ്മീനിന്റെ തിരക്കഥാകൃത്താണ് എസ്.എല്.പുരം.
നാരായണന്റെയും കാര്ത്യായനിയുടെയും മകനായി 1926 ഏപ്രില് 15ന് ആലപ്പുഴ ജില്ലയിലെ ചേര്ത്തല താലൂക്കില് കഞ്ഞിക്കുഴി ഗ്രാമത്തില് കാക്കരവീട് എന്ന ഇടത്തരം കര്ഷക കുടുംബത്തില് ജനിച്ചു.
ചെറിയ പ്രായത്തില്ത്തന്നെ കമ്യൂണിസ്റ്റ് പാര്ട്ടിയുമായി ബന്ധപ്പെട്ട് പ്രവര്ത്തിച്ചിരുന്നു. വിദ്യാര്ത്ഥിയായിരിക്കുമ്പോഴേ നല്ല സാഹിത്യവാസനയുണ്ടായിരുന്ന എസ്.എല്.പുരം പാര്ട്ടി സമ്മേളനങ്ങളില് പാട്ടുകളെഴുതിയും ഏകാങ്കനാടകങ്ങള് അവതരിപ്പിച്ചും ശ്രദ്ധ നേടി. പാര്ട്ടി പ്രവര്ത്തനത്തിന്റെ പേരില് സ്കൂളില് നിന്ന് പുറത്തായി. പുന്നപ്ര-വയലാര് സമരങ്ങളില് പങ്കെടുത്ത് ജയില്വാസം അനുഷ്ടിച്ചു.
നീണ്ടകാലത്തെ രാഷ്ട്രീയ ജീവിതത്തില് കണ്ടും കേട്ടും അറിഞ്ഞും നേടിയ അനുഭവങ്ങള് തന്റെ നാടകങ്ങളിലും തിരക്കഥകളിലും അദ്ദേഹം പ്രതിഫലിപ്പിച്ചിരുന്നു. നാടകരചന അഭിസിച്ചിട്ടില്ലാത്ത അദ്ദേഹം സ്വന്തമായ രചനാതന്ത്രം ആവിഷ്ക്കരിച്ചിരുന്നു.
ചില പ്രത്യേക കാര്യങ്ങളില് ജനശ്രദ്ധയാകര്ഷിക്കാനായി നാടകം മാധ്യമമാക്കി. ഉദ്യോഗജനമായ ജീവിത ദൃശ്യങ്ങളും സന്ദര്ഭങ്ങളും സംഭാഷണവൈചിത്രത്തിന്റെ സഹായത്താല് അവതരിപ്പിക്കുകയും ഹാസ്യം, മെലോഡ്രാമ, അസാധാരണ സങ്കേതങ്ങള് തുടങ്ങിയവ ഉപയോഗിച്ച് അര്ഷകമാക്കുകയും ചെയ്ത നാടകങ്ങളായിരുന്നു അദ്ദേഹത്തിന്റേത്. മിക്ക നാടകങ്ങളും സിനിമയാക്കിയിട്ടുണ്ട്.
27 നാടകങ്ങളും അഗ്നിശുദ്ധി എന്ന നോവലും ആയിരം വര്ണങ്ങള് എന്ന ഓര്മ്മക്കുറിപ്പും എഴുതിയിട്ടുണ്ട്. ഓരാള്കൂടി കള്ളനായി എന്ന നാടകത്തിന് സമസ്ത കേരള സാഹിത്യ പരിഷത്തിന്റെ അവാര്ഡ് ലഭിച്ചു.
കാക്കപ്പൊന്ന് എന്ന നാടകത്തിന് സാഹിത്യ അക്കാദമിയുടെയും ഇത്തിരി മണ്ണും ഒത്തിരി മനുഷ്യരും എന്ന നാടകത്തിന് കേന്ദ്ര വിദ്യാഭ്യാസ വകുപ്പിന്റെയും കാട്ടുകുതിരയ്ക്ക് കേരള സര്ക്കാരിന്റെയും അവാര്ഡുകള് ലഭിച്ചു.
അഭിനയ പ്രാധാന്യമുള്ള നാടകങ്ങളെഴുതുന്നതില് കഴിവുള്ള നമ്മുടെ നാടകകര്ത്താക്കളില് മുന്പന്തിയില് നില്ക്കുന്നതിന് അണിയറ, കുറച്ചറിയുക ഏറെ വിശ്വസിക്കുക, എന്നെ സൂക്ഷിക്കുക, കുരുക്ഷേത്രം, സത്രം, ചിരിക്കാത്ത വീടുകള്, വിലകുറഞ്ഞ മനുഷ്യര് എന്നീ നാടകങ്ങള് സഹായിച്ചു.
നാടകരംഗത്ത് പയറ്റിത്തെളിഞ്ഞതിന് ശേഷമാണ് രാഷ്ട്രീയ സിനിമാരംഗത്തേക്ക് കടന്നത്. കേരളത്തിലെ സാമൂഹിക രാഷ്ട്രീയ രംഗങ്ങളില് കോളിളക്കമുണ്ടാക്കിയ അദ്ദേഹത്തിന്റെ നാടകങ്ങള് സിനിമയായപ്പോഴും ചലനങ്ങള് സൃഷ്ടിച്ചു. നാടകത്തിന്റെ ചുവയുള്ള തിരക്കഥകളായിരുന്നെങ്കിലും അവയിലൂടെ നല്കപ്പെട്ട സന്ദേശങ്ങള് ജനങ്ങളെ സ്വാധീനിച്ചു.
സ്വന്തം നാടകമായ അഗ്നിപുത്രി ചലച്ചിത്രമാക്കിയപ്പോള് അതിന്റെ തിരക്കഥയ്ക്കും സംഭാഷണത്തിനും ദേശീയ അവാര്ഡ് ലഭിച്ചു. തകഴിയുടെ ചെമ്മീന് സിനിമയാക്കിയപ്പോള് അതിന്റെ തിരക്കഥയും സംഭാഷണവും എസ്.എല്.പുരത്തിന്റേതായിരുന്നു. പ്രസിഡന്റിന്റെ വെള്ളി മെഡല് നേടിയ കാവ്യമേളയ്ക്കും അദ്ദേഹം തന്നെയായിരുന്നു തിരക്കഥ രചിച്ചത്.
ഒരു പെണ്ണിന്റെ കഥ, യവനിക എന്നീ സിനിമകളുടെ തിരക്കഥയ്ക്കും സംഭാഷണത്തിനും കേരള സര്ക്കാരിന്റെ അവാര്ഡും നേടി. സ്വന്തം നാടകങ്ങള് രംഗത്ത് അവതരിപ്പിക്കുക എന്ന ലക്ഷ്യത്തോടെ സൂര്യസോമ എന്ന നാടകസമിതിക്കും രൂപം നല്കി.
എസ്.എല്.പുരം ഹൈസ്കൂള് അധ്യാപികയായ പി.വി.ഓമനയാണ് ഭാര്യ. സ്കൂള് വിദ്യാര്ത്ഥികളായ ജയസൂര്യയും ജയസോമയും മക്കളാണ്.