മരണം നിശ്ചയമാണെങ്കിലും എല്ലാ മരണവും നമ്മളില്‍ ഞെട്ടലുണ്ടാക്കുന്നു. ഉയരമുള്ള അധികം ചിരിക്കാത്ത ഈ നടനെ എത്ര പെട്ടെന്നാണ് രംഗബോധമില്ലാത്ത കോമാളിയായ മരണം തട്ടിയെടുത്തത്!.
സെല്ലുലോയ്‌ഡിലെ അലസ സൌന്ദര്യമായിരുന്നു രഘുവരന്‍. ആസ്വാദകര്‍ക്ക് വാചാലത അദ്ദേഹത്തില്‍ ദര്‍ശിക്കുവാന്‍ കഴിയുകയില്ല. അലസ ചലനങ്ങളിലൂടെ അല്‍പ്പം വിക്കിക്കൊണ്ട് വെള്ളിത്തിരയില്‍ സംസാരിക്കുന്ന ഈ നടന്‍റെ ഭൌതിക സാന്നിദ്ധ്യം ഇനി ഉണ്ടാകില്ലെന്നത് വളരെ വിഷമമുണ്ടാക്കുന്ന കാര്യമാണ്.
വളരെക്കുറച്ച് മലയാള സിനിമകളില്‍ മാത്രമേ രഘുവരന്‍ അഭിനയിച്ചിട്ടുള്ളൂ. അദ്ദേഹത്തിന്‍റെ സ്വഭാവ സവിശേഷതകള്‍ സ്വീകരിക്കുവാന്‍ ബുദ്ധിമുട്ടായിരുന്നതു മൂലമാണ് കൂടുതല്‍ മലയാള സിനിമകളില്‍ അദ്ദേഹത്തിന് അവസരം ലഭിക്കാതെയിരുന്നതെന്ന് സംവിധായകന്‍ രാജസേനന്‍ അഭിപ്രായപ്പെടുന്നു.
അതേസമയം, തമിഴിലെ തിരക്കു മൂലമാണ് രഘുവരന്‍ മലയാള സിനിമകളില്‍ അധികം അഭിനയിക്കാതെയിരുന്നതെന്ന് നടന് മമ്മൂട്ടി പറയുന്നു. ഈ വിഷയത്തില്‍ തര്‍ക്കം ഉണ്ടാകാം.
എന്നാല്‍, ഒരു കാര്യം ഉറപ്പാണ്. മദ്യത്തിനും മയക്കുമരുന്നിനും അടിമയായിരുന്നു രഘുവരന്‍. പല്ലപ്പോഴും ആ ജീവിതത്തില്‍ താളപ്പിഴകള്‍ ഉണ്ടായി.
അദ്ദേഹത്തിന്‍റെ ജീവിതത്തിലേക്ക് നടി രോഹിണി കടന്നു വന്നപ്പോള്‍ അദ്ദേഹത്തിന്‍റെ കുത്തഴിഞ്ഞ ജീവിതത്തില്‍ അല്‍പ്പം മാറ്റം വന്നതായിരുന്നു. എന്നാല്‍, പിന്നീട് രഘുവരന്‍ വീണ്ടും പഴയ ജീവിതത്തിലേക്ക് തിരിച്ചു പോയി. തുടര്‍ന്ന് ഈ ബന്ധം 2004 ല്‍ വിവാഹമോചനത്തില്‍ അവസാ‍നിച്ചു.
ജീവിതത്തില്‍ അരാ‍ജകവാദപരമായ സമീപനങ്ങള്‍ പിന്തുടര്‍ന്നുവെങ്കിലും സ്വന്തമായ അഭിനയ ശൈലി അദ്ദേഹത്തിനുണ്ടായിരുന്നു. വില്ലനായി, നായകനായി അദ്ദേഹം വെള്ളിത്തിരയില്‍ സജീവ സാന്നിദ്ധ്യമായിരുന്നു.
PRO
1982 ല്‍ സിനിമാ അഭിനയത്തിന് തുടക്കം കുറിച്ച രഘുവരന്‍ 2007ല്‍ നാലു സിനിമകളില്‍ അഭിനയിച്ചു. ഇതു വ്യക്തമാക്കുന്നത് പ്രശ്‌നങ്ങള്‍ ഒരുപാട് ഉണ്ടായിരുന്നുവെങ്കിലും അദ്ദേഹം അഭിനയത്തിനെ അതിലും സ്‌നേഹിച്ചിരുന്നുവെന്നാണ്.
ദൈവത്തിന്‍റെ വികൃതികളിലെ രഘുവരന്‍റെ അല്‍‌ഫോണ്‍സയെന്ന നായകകഥാപാത്രം മലയാളിയുടെ മനസ്സില്‍ നിന്ന് ഒരിക്കലും മായാത്തതാണ്. 108 മിനിറ്റുള്ള ഈ സിനിമ കണ്ടിറങ്ങുമ്പോള്‍ അല്‍‌ഫോണ്‍സ് ആസ്വാദകന്‍റെ മനസ്സിനെ ഒരു പാട് അസ്വസ്ഥതപ്പെടുത്തും.
തന്‍റെ നോവലിലെ നായകകഥാപാത്രത്തെ രഘുവരന്‍ എങ്ങനെ അവതരിപ്പിക്കുമെന്ന് മുകുന്ദന് ആശങ്കയുണ്ടായിരുന്നു. എന്നാല്‍, രഘുവരന്‍ അദ്ദേഹത്തെ നിരാശപ്പെടുത്തിയില്ല. അതുപോലെ ബാഷയിലേതു പോലുള്ള സിനിമകളിലെ വില്ലന്‍ കഥാപാത്രങ്ങള്‍ മനോഹരമായിരുന്നു. കൊമ്പന്‍ മീശയുള്ള തടിച്ച വില്ലന്‍ സങ്കല്‍പ്പങ്ങളില്‍ നിന്ന് വ്യത്യസ്തനായിരുന്നു കൃശഗാത്രനായ രഘുവരന്‍.
കുനിഞ്ഞു നടക്കുന്ന കുശാഗ്രബുദ്ധിക്കാരന്‍റെ മുഖ ഭാവമുള്ള രഘുവരനെന്ന വില്ലന്‍ പ്രത്യക്ഷപ്പെടുമ്പോള്‍ തീയേറ്ററിലെ കാണികള്‍ കൈയ്യടിക്കുക പതിവാണ്. വളരെക്കുറച്ച് വില്ലന്‍‌മാര്‍ക്ക് മാത്രമേ ഈ സ്വീകരണം ലഭിച്ചിരുന്നുള്ളൂ. രഘുവരന്‍ ഏതു വേഷം ചെയ്താലും ആസ്വാദകര്‍ക്ക് സ്വീകരിക്കുവാന്‍ ബുദ്ധിമുട്ടുണ്ടായിരുന്നില്ല. കാരണം, വില്ലനായാലും നായകനായാലും അദ്ദേഹം അതിന് സ്വന്തമായ ഒരു ശൈലി നല്‍കിയിരുന്നു.
രഘുവരന്‍ തന്നിലെ നടനോട് നൂറു ശതമാനം നീതി പുലര്‍ത്തി. അതേസമയം ജീവിതയാത്രയില്‍ ഈ നടന് പലയിടത്തും കാല്‍ തെറ്റിയെന്നത് ഓര്‍ക്കുമ്പോള്‍ വിഷമം തോന്നാം.
