സൂപ്പര്‍താരങ്ങള്‍ക്കെതിരെ, പ്രധാനമായും മമ്മൂട്ടിക്കെതിരെ ഒളിയമ്പുമായി നടന്‍ തിലകന്‍ വീണ്ടും രംഗത്ത്. മോഹന്‍ലാലിന് ലഭിച്ച ലഫ്റ്റനന്‍റ് കേണല്‍ പദവി മമ്മൂട്ടിക്ക് ലഭിക്കില്ലെന്ന് തിലകന്‍ പറഞ്ഞു. തിരുവനന്തപുരത്ത് ആശാന്‍ അക്കാദമിയുടെ ആദരം സ്വീകരിച്ച ശേഷം സംസാരിക്കുമ്പോഴാണ് തിലകന്‍ ഇങ്ങനെ പറഞ്ഞത്.
“സൂപ്പര്‍താരങ്ങള്‍ അവാര്‍ഡുകള്‍ക്കു വേണ്ടി പരക്കം പായുകയാണ്. ഒരു പദവി ഒരാള്‍ക്ക് ലഭിക്കുമ്പോള്‍ മറ്റേയാളും അത് നേടുന്നു. എന്നാല്‍ ഒന്നു മാത്രം അതില്‍ ഒരാള്‍ക്ക് ലഭിക്കില്ല, അത് പട്ടാളവേഷമാണ്” - മമ്മൂട്ടിയെ പരോക്ഷമായി സൂചിപ്പിച്ച് തിലകന്‍ പറഞ്ഞു.
“സൂപ്പര്‍താരങ്ങള്‍ കോടികളാണ് പ്രതിഫലം വാങ്ങുന്നത്. എന്നേപ്പോലെ ചെറിയ വേതനം വാങ്ങുന്നവരെ ഒതുക്കാനാണ് അവരുടെ ശ്രമം. അവരെ ആശ്രയിച്ചു നില്‍ക്കുന്ന ഉപഗ്രഹങ്ങള്‍ അതിന് പിന്തുണയും നല്‍കുന്നു” - തിലകന്‍ പറഞ്ഞു.
PRO
“അഭിനയം എന്‍റെ തൊഴിലാണ്. സ്ക്രീനിലും സ്റ്റേജിലുമേ അഭിനയമുള്ളൂ, ജീവിതത്തില്‍ അഭിനയിക്കാനറിയില്ല. അമ്മയില്‍ നിന്ന് പുറത്താക്കി എന്നുപറഞ്ഞ് അഭിനയം ഉപേക്ഷിക്കാന്‍ കഴിയില്ല. അമ്മയില്‍ നിന്ന് എന്നെ പുറത്താക്കിയവര്‍ ലജ്ജിക്കും. വിനയന്‍റെ ചിത്രത്തില്‍ അഭിനയിച്ചതിനെയാണ് വലിയ തെറ്റെന്ന് പറയുന്നത്. വിനയന്‍റെ ചിത്രത്തില്‍ അഭിനയിക്കരുതെന്ന് ആവശ്യപ്പെട്ടുള്ള സര്‍ക്കുലറൊന്നും ലഭിച്ചിട്ടില്ല. ഇനി അഥവാ ലഭിച്ചാലും വിനയന്‍റെ പടത്തില്‍ അഭിനയിക്കാതിരിക്കില്ല” - തിലകന്‍ വെളിപ്പെടുത്തി.
“പ്രശ്നങ്ങള്‍ തീരണമെങ്കില്‍ ഞാന്‍ ഖേദം പ്രകടിപ്പിക്കണമെന്നായിരുന്നു നിര്‍ദ്ദേശം. ഖേദം പ്രകടിപ്പിക്കേണ്ടത് തെറ്റ് ചെയ്തവരാണ്. ഞാന്‍ തെറ്റ് ചെയ്തിട്ടില്ല. ഞാന്‍ കേന്ദ്ര കഥാപാത്രത്തെ അവതരിപ്പിക്കുന്ന സിനിമ അടുത്ത മാസം പ്രഖ്യാപിക്കും. ജൂലൈയില്‍ അരങ്ങേറത്തക്ക വിധത്തില്‍ ഒരു നാടകത്തിന്‍റെ പ്രവര്‍ത്തനവും നടന്നുവരുന്നു” - തിലകന്‍ അറിയിച്ചു.
