ഭാസ്കര കിരണങ്ങള്‍ : തിരിച്ചറിയേണ്ട വ്യത്യസ്തമായ ഒരു പുസ്തകം
WD
WD
ജയരാജന്‍ ജി വലിയശാല എന്ന പ്രസിദ്ധ ഫോട്ടോഗ്രാഫര്‍ എഴുതിയ ഭാസ്കര കിരണങ്ങള്‍ യഥാര്‍ത്ഥത്തില്‍ നാം തിരിച്ചറിയേണ്ട വ്യത്യസ്തമായൊരു പുസ്തകമാണ്.
ഫോട്ടോ ഗ്രാഫര്‍ എഴുതിയ ഫോട്ടോഗ്രാഫിയെ കുറിച്ചല്ലാത്ത ഒരു പുസ്തകം, അതിനുമപ്പുറം പി.ഭാസ്കരന്‍ എന്ന കൃതഹസ്തനായ കവിയേയും ഗാനരചയിതാവിനെയും കുറിച്ചുള്ള പുസ്തകം എന്നിങ്ങനെയുള്ള വ്യത്യസ്തതകള്‍ ഈ പുസ്തകത്തിനുണ്ട്.
രചനയ്ക്ക് സ്വീകരിച്ചിരിക്കുന്ന ശൈലിയാണ് മറ്റ് പുസ്തകങ്ങളില്‍ നിന്നും അതിനെ വ്യത്യസ്തമാക്കുന്നത്. ഒരു വിഷയത്തില്‍ തുടങ്ങി അതിനോട് ബന്ധപ്പെട്ട മറ്റ് കാര്യങ്ങളിലേക്കും സംഭവങ്ങളിലേക്കും സൂചനകളിലേക്കും ശാസ്ത്രവിഷയങ്ങളിലേക്കും കൌതുകങ്ങളിലേക്കും ഒക്കെ കടന്നു ചെല്ലുകയും പിന്നീട് തിരിച്ചുവരികയും ചെയ്യുന്ന രീതിയാണ് എഴുത്തുകാരന്‍ എന്ന് പേരെടുക്കാത്ത ജയരാജന്‍ സ്വീകരിച്ചിരിക്കുന്നത്.
പി.ഭാസ്കരന്‍റെ ചലച്ചിത്ര ഗാനങ്ങളേയും ജീവിതത്തെയും കുറിച്ചുള്ള ഈ പുസ്തകത്തില്‍ ഒട്ടേറെ വിലപ്പെട്ട വിവരങ്ങളുണ്ട്. ചില പ്രധാന ഗാന രചനയ്ക്ക് കാരണമായ സംഭവങ്ങള്‍, അത് എഴുതിയ സന്ദര്‍ഭം, സാഹചര്യം, സ്ഥലം, അതിനു പങ്കാളികളോ നിമിത്തമോ ആയ ആളുകള്‍ എന്നിങ്ങനെ പല കാര്യങ്ങളെ കുറിച്ചും അധികം പേര്‍ക്കറിയാത്ത ഒട്ടേറേ വിവരങ്ങള്‍ ആനുഷംഗികമായി സൂചിപ്പിച്ചുപോന്നുണ്ട് ഗ്രന്ഥകര്‍ത്താവ്.
ഉദാഹരണത്തിന്, പി.ഭാസ്കരന്‍റെ നീലക്കുയില്‍ എന്ന സിനിമയെ കുറിച്ച് പറയുന്നിടത്ത് നീലക്കുയില്‍ എന്താണെന്നും അതിന്‍റെ ജീവശാസ്ത്രപരമായ വിശദാംശങ്ങളെ കുറിച്ചും കരിം‌കുയില്‍, ചെമ്പോത്ത്, കൊമ്പന്‍ വാനം‌പാടി തുടങ്ങി കുയില്‍ വംശത്തില്‍ പെട്ട കിളികളെ കുറിച്ചും ജയരാജന്‍ പറഞ്ഞുപോകുന്നു. അതില്‍ നിന്നും ഇന്ത്യയുടെ വാനമ്പാടിയായ ലതാമങ്കേഷ്കറെ കുറിച്ചു പറയുന്നു.
ഇത് പരിചിതമല്ലാത്ത ഒരു രചനാ ശൈലി ആയതുകൊണ്ട് ഗ്രന്ഥരചനാ പടുക്കള്‍ക്ക് അരോചകമായി തോന്നാമെങ്കിലും കാര്യങ്ങളെ കുറിച്ച് അറിയാന്‍ ആഗ്രഹമുള്ള ആര്‍ക്കും രസകരമായി അനുഭവപ്പെടും.
WD
WD
വെറുതേ രസം കൊല്ലിയായൊരു പുസ്തകമല്ല. ഒട്ടേറെ വിലപ്പെട്ട അറിവുകള്‍ ഈ പുസ്തകം നമുക്ക് തരുന്നു. ബോട്ടണി ബിരുദ ധാരിയായ ജയരാജിന്‍റെ ചില സസ്യശാസ്ത്ര വിജ്ഞാനവും പുസ്തകത്തില്‍ കാണാം.
അത്യപൂര്‍വ്വമായ ഒട്ടേറെ ഫോട്ടോകള്‍ ഈ പുസ്തകത്തിന്‍റെ മൂല്യം വര്‍ദ്ധിപ്പിക്കുന്നു. ജയരാജന്‍ സ്വയമെടുത്തതും ശേഖരിച്ചതുമായ അപൂര്‍വമായ പല പടങ്ങളും ഇതില്‍ കാണാം. ജയരാജന്‍ എടുത്ത ഗുരുവായൂര്‍ കേശവന്‍റെ പടം അത്തരത്തിലൊന്നാണ്. ഭാസ്കരന്‍റെ ഗുരുവായൂര്‍ കേശവന്‍ എന്ന പടത്തെ കുറിച്ച് പറയുന്നതിനിടയ്ക്കാണ് ഈ ചിത്രം കൊടുത്തിരിക്കുന്നത്.
പി.ഭാസ്കരന്‍ സംവിധാനം ചെയ്ത സിനിമകള്‍, എഴുതിയ പാട്ടുകള്‍ എന്നിവയുടെ വിശദമായ ലിസ്റ്റ് പുസ്തകത്തിലുണ്ട്. പ്രധാനപ്പെട്ട പത്ത് മുപ്പത് പാട്ടുകള്‍ മുഴുവനായി കൊടുത്തിരിക്കുന്നു. പാട്ടുകളുടെ പട്ടിക, പ്രണയ ഗാനങ്ങള്‍, ഭക്തി ഗാനങ്ങള്‍, യുഗ്മ ഗാനങ്ങള്‍, നാടന്‍ പാട്ടുകള്‍, ശോക ഗാനങ്ങള്‍, കുട്ടികള്‍ക്കുള്ള പാട്ടുകള്‍, ദേശഭക്തി ഗാനങ്ങള്‍ എന്നിങ്ങനെയൊക്കെ തരം‌തിരിച്ചും കൊടുത്തിട്ടുണ്ട്.
തമിഴ് ചിത്രമായ അപൂര്‍വ സഹോദരര്‍‌കള്‍ക്ക് വേണ്ടിയാണ് പി.ഭാസ്കരന്‍ ആദ്യം സിനിമാപാട്ട് എഴുതുന്നത്. കടക്കണ്ണിന്‍ തലപ്പത്ത് കറങ്ങും വണ്ടേ..... എന്ന പാട്ടിന്‍റെ പുറകേപോയ ജയരാജിന്‍റെ അന്വേഷണമാണ് ഭാസ്കര കിരണങ്ങള്‍ എന്ന പുസ്തകത്തില്‍ അവസാനിച്ചത്. ഈ പുസ്തകം കൈരളിയും സഹൃദയരും കൈനീട്ടി സ്വീകരിക്കും എന്ന് ഉറപ്പാണ്.
ജയരജന്‍ ശി വലിയശാല, ഗോവിന്ദഭവന്‍, വലിയശാല, തിരുവനന്തപുരം എന്ന വിലാസത്തില്‍ ബന്ധപ്പെട്ടാല്‍ പുസ്തകങ്ങള്‍ ലഭിക്കും.
