സീരിയല്-ഡോക്യുമെന്ററി സംവിധായകനും മിനിസ്ക്രീന് ഡയറക്ടറിയുടെ ചീഫ് എഡിറ്ററുമായ ആനയറ ഷാജിയെ (56) ലോഡ്ജ് മുറിയില് മരിച്ച നിലയില് കണ്ടെത്തി. പേരൂര്ക്കട മാര്ക്കറ്റിന് എതിര്വശമുള്ള ലോഡ്ജ് മുറിയിലാണ് ജഡം കാണപ്പെട്ടത്. വെള്ളിയാഴ്ച രാവിലെ കാപ്പിയുമായെത്തിയ ആളാണ് ഷാജി കട്ടിലില് നിന്നും താഴെ വീണ് കമിഴ്ന്ന് കിടക്കുന്നനിലയില് കണ്ടത്.
മുറി കുറ്റിയിടാതെ കിടന്നതിനാല് ആദ്യം സംശയം തോന്നി പോലീസിനെ അറിയിച്ചു. ഉറക്കത്തിനിടയില് ഹൃദയാഘാതമുണ്ടായതാണ് മരണകാരണമെന്ന് കരുതുന്നു. കരള് സംബന്ധമായ അസുഖംമൂലം 2 മാസം മുമ്പ് ആശുപത്രിയിലായിരുന്നു. താഴെ വീണതില് ചുണ്ടില് മുറിവുണ്ടെങ്കിലും ബന്ധുക്കളാരും സംശയം പ്രകടിപ്പിച്ചിട്ടില്ല.
ആനയറ വെണ്പാലവട്ടം കളത്തുവിളാകത്ത് വീട്ടില് മാധവന്റേയും ശാന്തമ്മയുടേയും മകനാണ്. സഹോദരങ്ങള്: പത്മ ജി. നായര്, അരുണ് ജി.മേനോന്. വെണ്പാലവട്ടത്തുള്ള മഹേശ്വരിയെ വിവാഹം കഴിച്ചുവെങ്കിലും ആ ബന്ധം ഉപേക്ഷിച്ച് ഒറ്റയ്ക്കാണ് താമസം. മക്കളില്ല.
സിനിമാ സംവിധായകരായ ശങ്കരന്നായര്, ഐ വി ശശി, കെ ജി ജോര്ജ് എന്നിവര്ക്കൊപ്പം അസോസിയേറ്റായി പ്രവര്ത്തിച്ചിരുന്ന എം ഷാജി എന്ന ആനയറ ഷാജി പന്ത്രണ്ട് വര്ഷയായി ചലച്ചിത്ര പ്രവര്ത്തകരുടെ വിവരങ്ങള് ഉള്ക്കൊള്ളിച്ച് സുഷ കമ്മ്യൂണിക്കേഷന്റെ പേരില് മലയാള മിനിസ്ക്രീന് ഡയറക്ടറി പുറത്തിറക്കിവരികയാണ്.