വാസ്തുശാസ്ത്രം നിഷ്കര്‍ഷിക്കുന്ന തരത്തിലുള്ള ഒരു താമസസ്ഥലമല്ല നിങ്ങളുടേതെങ്കില്‍ ചില ചെറിയ കാര്യങ്ങളില്‍ ശ്രദ്ധ നല്‍കുന്നത് ജീവിതത്തില്‍ വളരെ വലിയ മാറ്റങ്ങള്‍ക്ക് കാരണമാവും. ആനയുടെ പ്രതിമയും കുതിര ലാടവും പോലെയുള്ള ചിഹ്നങ്ങള്‍ക്ക് വാസ്തുവിലും പ്രാധാന്യമുണ്ട്.
ആന എന്ന പറയുമ്പോള്‍ തന്നെ കറുത്ത വലിയ ഉടലും അഴകൊത്ത തുമ്പിയും കൊമ്പും ആഡ്യതയോടെയുള്ള ആ നടത്തവും എല്ലാം നമ്മുടെ മനസ്സിലേക്ക് ഓടിയെത്തും. ശക്തിയുടെ പര്യായമായിട്ടാണ് നാം ആനയെ കാണുന്നത്.
ദേവരാ‍ജന്‍ ഇന്ദ്രന്‍റെ വാഹനമായ ഐരാവതത്തിന്‍റെ മഹിമകളിലൂടെയും നമുക്ക് ഗജേന്ദ്രന്‍റെ ശക്തിയെ കുറിച്ച് മനസ്സില്‍ പതിഞ്ഞ അറിവുകളുണ്ട്. ആനകളുടെ രൂപത്തിന് വാസ്തു ശാസ്ത്രത്തിലും പ്രാധാന്യമുണ്ട്. ആനയുടെ പ്രതിമ വീട്ടില്‍ വയ്ക്കുന്നത് വിപരീത ഊര്‍ജ്ജത്തിന്‍റെ അളവിനെ കുറയ്ക്കുമെന്നാണ് വാസ്തു വിദഗ്ധര്‍ അഭിപ്രായപ്പെടുന്നത്.
ആനയെ കുറിച്ചുള്ള ധാരണകള്‍ ഉപബോധ മനസ്സില്‍ ഉറച്ചിരിക്കുന്നതിനാല്‍ ആനയുടെ പ്രതിമ വീട്ടില്‍ വയ്ക്കുന്നതിലൂടെ താമസക്കാരുടെ വ്യക്തിപരമായ ഊര്‍ജ്ജ നിലയെ ഉയര്‍ത്താനും അതു വഴി തടസ്സങ്ങളെ അതിജീവിക്കാനും ധൈര്യം, ശക്തി എന്നീ ഗുണങ്ങള്‍ പ്രതിഫലിപ്പിക്കാനും കഴിയും. എല്ലാത്തരം ആന പ്രതിമകളും ഫലവത്താകില്ല എന്നുകൂടി അറിഞ്ഞിരിക്കേണ്ടതുണ്ട്.
PRO
ദ്വേഷ്യം വെളിപ്പെടുത്തുന്ന കണ്ണുകളോടെ തുമ്പിക്കൈ ഉയര്‍ത്തി ആക്രമ സന്നദ്ധനായി നില്‍ക്കുന്ന ഒരു ആനയുടെ പ്രതിമ പ്രയോജനം ചെയ്യില്ല. അതേപോലെ, വിശന്ന് നില്‍ക്കുന്ന ഒരു ആനയുടെ പ്രതിമയും ഉപയോഗപ്രദമെന്ന് പറയാനാവില്ല. ശാന്തനായി, സന്തോഷഭാവത്തോടെ തലയെടുത്ത് നില്‍ക്കുന്ന ആനയുടെ പ്രതിമ നിങ്ങളുടെ വീടിന് ഒരു മുതല്‍ക്കൂട്ടാവും.
കുതിരലാടം
ആനയുടെ പ്രതിമ പോലെ തന്നെ കുതിര ലാടവും വാസ്തു ശാസ്ത്രകാരന്‍‌മാര്‍ അംഗീകരിച്ച ഒരു അടയാളമാണ്. വീട്ടിലെ വിപരീത ഊര്‍ജ്ജത്തെ പുറന്തള്ളാനാണ് കുതിരലാടം ഉപയോഗിക്കുന്നത്. ഉത്തമ ഫലം ലഭിക്കാന്‍ കുതിരലാടം ശരിയായ രീതിയില്‍ തന്നെ വയ്ക്കാന്‍ ശ്രദ്ധിക്കണം.
കുതിരലാടം ഇംഗ്ലീ‍ഷ് അക്ഷരമാലയിലെ “യു” എന്ന അക്ഷരത്തിന്‍റെ മാതൃകയിലാണെന്ന് എല്ലാവര്‍ക്കും അറിയാമല്ലോ. ഇതിന്‍റെ രണ്ട് അറ്റവും മുകളിലേക്ക് വരത്തക്ക വിധം പ്രധാന വാതിലിനു മുകളില്‍ വെളിയിലേക്ക് ദര്‍ശനം ആകത്തക്ക വിധത്തില്‍ ആയിരിക്കണം പതിക്കേണ്ടത്.
