പ്രശാന്തമായി ഒരു രാത്രി കഴിഞ്ഞു പോവുക എല്ലാവര്‍ക്കും ഇഷ്ടമാണ്. പ്രശ്നങ്ങളേതുമില്ലാതെ സുഖമായൊരു ഉറക്കം. സ്വച്ഛന്ദമായ ഒരു മനസ്സും ആ മനോനില കൈവരിക്കാന്‍ സഹായിക്കുന്ന ഒരു കിടപ്പ് മുറിയും മാത്രം മതി നല്ലൊരു രാവിനെയും നല്ലൊരു ജീവിതത്തെയും വരവേല്‍ക്കാന്‍.
വാസ്തു ശാസ്ത്രമനുസരിച്ചുള്ള ഒരു കിടപ്പ് മുറിയില്‍ സന്തോഷവും സംതൃപ്തിയും കളിയാടും. കിടപ്പ് മുറിയുടെ സ്ഥാനം, കിടപ്പിന്‍റെ രീതി, ചുവരിലെ നിറങ്ങള്‍, വാതിലുകളുടെ സ്ഥാനം ഇവയിലൊക്കെ കുറച്ച് ശ്രദ്ധ നല്‍കിയാല്‍ നിങ്ങള്‍ക്ക് നിങ്ങളെ എതിരേല്‍ക്കുന്ന ഒരു കിടപ്പ് മുറി സ്വന്തമാവും. മാനസിക സംഘര്‍ഷങ്ങള്‍ക്ക് അവധി നല്‍കി ആ കൊച്ചു സ്വര്‍ഗ്ഗത്തിലെ രാത്രികള്‍ ആസ്വദിക്കാനും കഴിയും.
പ്രധാന കിടപ്പ് മുറി തെക്ക് പടിഞ്ഞാറ് അല്ലെങ്കില്‍ വടക്ക് പടിഞ്ഞാറ് ദിശയില്‍ ആയിരിക്കണം. ബഹുനില മന്ദിരമാണെങ്കില്‍ പ്രധാന കിടപ്പ് മുറി മുകള്‍ നിലയിലാവണം എന്നാണ് വിദഗ്ധരുടെ അഭിപ്രായം. കുടുംബ നാഥനോ വിവാഹിതരായ മക്കള്‍ക്കോ ഈ മുറി ഉപയോഗിക്കാം. എന്നാല്‍, ആവിവാഹിതര്‍ പ്രധാന കിടപ്പ് മുറി ഉപയോഗിക്കുന്നത് പ്രശ്നങ്ങള്‍ സൃഷ്ടിക്കും. അതേപോലെ തന്നെ വീടിന്‍റെ വടക്ക് കിഴക്ക് ഭാഗത്ത് കിടപ്പ് മുറി ഒരുക്കാതിരിക്കാനും ശ്രദ്ധിക്കണം.
കുട്ടികളുടെ കിടപ്പ് മുറി പടിഞ്ഞാറ് അല്ലെങ്കില്‍ വടക്ക് പടിഞ്ഞാറ് ദിശയില്‍ ആവുന്നതാണ് നല്ലെതെന്ന് വാസ്തു ശാസ്ത്രം അനുശാസിക്കുന്നു. കൌമാരക്കാര്‍ക്ക് വീടിന്‍റെ കിഴക്ക് ഭാഗത്ത് കിടപ്പ് മുറി ഒരുക്കുന്നതില്‍ തെറ്റില്ല. അതിഥികള്‍ക്ക് വടക്ക് പടിഞ്ഞാറുള്ള കിടപ്പ് മുറി തന്നെയാണ് ഉത്തമം.
SASI
കിടപ്പ് മുറിയുടെ ചുവരിന് നിറം ഏതാവണമെന്നും വാസ്തു ശാസ്ത്രജ്ഞര്‍ നിര്‍ദ്ദേശിക്കുന്നുണ്ട്. പ്രശാന്തമായ ഒരു രാത്രിക്ക് ഇളം റോസ്, കടും നീല, കടും പച്ച, ചാര നിറം എന്നിവ ഏറ്റവും അനുയോജ്യമാണെന്നാണ് ഇവരുടെ അഭിപ്രായം. വിവാഹിതരും പ്രത്യേകിച്ച് നവ ദമ്പതികള്‍ക്കും ഇളം റോസ് നിറത്തിലുള്ള ചുവരുകള്‍ ഊഷ്മളത പകരും.
ചുവരുകള്‍ക്ക് വെളുപ്പ് അല്ലെങ്കില്‍ മഞ്ഞ നിറം നല്‍കുന്നത് ഒട്ടും അഭികാമ്യമല്ല എന്നാണ് മിക്ക വാസ്തു വിദഗ്ധരുടെയും അഭിപ്രായം.
കിടപ്പ് മുറിയിലേക്ക് ഒരു രാത്രിയെ വരവേല്‍ക്കാന്‍ നടന്ന് കയറുന്നത് വടക്ക്, പടിഞ്ഞാറ്, കിഴക്ക് ഭാഗങ്ങളില്‍ നിന്നാവണം. ഇതിനായി, മേല്‍പ്പറഞ്ഞ ദിക്കുകളില്‍ തന്നെയാവണം വാതിലിനു സ്ഥാനം കാണേണ്ടത്. വാതില്‍ ഒറ്റപ്പാളിയുള്ളത് ആയിരിക്കാനും ശ്രദ്ധിക്കണം.
കിടക്കുന്നത് എങ്ങനെ വേണമെന്നും വാസ്തു ശാസ്ത്രപരമായി വ്യക്തമായ സൂചനയുണ്ട്. സ്വന്തം വീട്ടില്‍ കിടക്കുമ്പൊള്‍ തലയുടെ വശം കിഴക്ക് അല്ലെങ്കില്‍ തെക്ക് ഭാഗത്തായിരിക്കണം. ഒരിക്കലും വടക്ക് ദിക്കിന് അഭിമുഖമായി തല വച്ച് ഉറങ്ങരുത്. യാത്രയില്‍ ആണെങ്കിലും മറ്റേതെങ്കിലും ഗൃഹത്തില്‍ ആണെങ്കിലും തല പടിഞ്ഞാറ് ദിക്കിന് അഭിമുഖമായി വച്ച് ഉറങ്ങാം.
രാവിലെ ഉണര്‍ന്നെണീക്കുമ്പോള്‍ വലത് പാദം കൊണ്ട് വേണം ഭൂമീ ദേവിയെ സ്പര്‍ശിക്കാന്‍. കിടപ്പ് മുറി വായനയ്ക്കും ഉപയോഗിക്കുന്നു എങ്കില്‍ കിഴക്ക് ഭാഗമാണ് ഉത്തമം. വാര്‍ഡ് റോബ് കിടപ്പ് മുറിയുടെ വടക്ക് പടിഞ്ഞാറ് ഭാഗത്തോ തെക്ക് പടിഞ്ഞാറ് ഭാഗത്തോ ആവാം.
