‘രാമായണം’ റെക്കോര്‍ഡുകള്‍ തകര്‍ത്ത് മുന്നേറുകയാണ്. ആഗോളതലത്തിൽ ഏറ്റവുമധികം ആളുകൾ കണ്ട വിനോദ പരിപാടിയായി രാമായണം ലോക റെക്കോർഡ് സ്ഥാപിച്ചിരിക്കുന്നു. 33 വർഷത്തിനുശേഷം വീണ്ടും സംപ്രേഷണം ചെയ്ത രാമായണം ഗെയിം ഓഫ് ത്രോൺസിന്റെ അവസാന എപ്പിസോഡിന്‍റെ റെക്കോര്‍ഡ് ഒറ്റ രാത്രിയിലെ 19.3 ദശലക്ഷം കാണികളെക്കൊണ്ട് തകര്‍ത്തിരിക്കുകയാണ്. 2019 മെയ് മാസത്തില്‍ ഗെയിം ഓഫ് ത്രോൺസ് സ്ഥാപിച്ച റെക്കോര്‍ഡാണ് ഒരു വര്‍ഷത്തിന് ശേഷം തകര്‍ന്നടിഞ്ഞത്.
രാമാനന്ദ് സാഗർ എഴുതി, നിർമ്മിച്ച്, സംവിധാനം ചെയ്ത രാമായണം 1987ൽ ദൂരദർശനിൽ ആദ്യമായി സംപ്രേഷണം ചെയ്യുകയും കാഴ്ചക്കാരുടെ മനസില്‍ ഒരു നിത്യവിസ്‌മയമായി നിലകൊള്ളുകയും ചെയ്തു.
ഈ സീരിയലില്‍ രാമനായി അരുൺ ഗോവിൽ, സീതയായി ദീപിക ചിക്‍ലിയ ടോപിവാല, ലക്ഷ്‌മണനായി സുനിൽ ലഹ്രി എന്നിവരാണ് അഭിനയിച്ചത്. രാവണനായി അരവിന്ദ് ത്രിവേദിയും ഹനുമാനായി ദാരാസിങ്ങും അഭിനയിച്ചു.
