ഊർമിള ഉണ്ണി വൻ തോൽ‌വിയെന്ന് നടി ദിവ്യ

താരസംഘടനയായ 'അമ്മ'യിലേക്ക് ദിലീപിനെ തിരിച്ചെടുത്തതിനെത്തുടർന്ന് സിനിമാ മേഖലയിൽ ഉണ്ടായ വിള്ളലാണ് ഇപ്പോൾ ചർച്ചയായൊക്കൊണ്ടിരിക്കുന്നത്. ദിലീപ് വിഷയത്തിൽ നിലപാട് എടുത്ത ഊർമിള ഉണ്ണിക്കെതിരെ വിമർശനം രൂക്ഷമാകുകയാണ്. 

ദിലീപിനെ അമ്മ സംഘടനയിൽ തിരികെ എടുക്കുന്നില്ലേ എന്ന ചോദ്യം യോഗത്തിൽ ഉന്നയിച്ചത് നടി ഊർമിള ഉണ്ണിയാണ്. അതിനെ തുടർന്ന് നടി നടത്തിയ പ്രസ്താവനകൾ സമൂഹമാധ്യമങ്ങളിൽ വലിയ ചർച്ചയായിരുന്നു.

ഇപ്പോഴിതാ ഊർമിള ഉണ്ണിയെ വിമർശിച്ച് നടി ദിവ്യ ഗോപിനാഥ്. ‘വേലക്കാരിയായിരുന്തലും നീ എൻ മോഹ വല്ലി എന്ന് നടി....വൻ തോൽവിയായിപ്പോയി.’–ദിവ്യ സമൂഹമാധ്യമത്തില്‍ കുറിച്ചു.

വീട്ടിലെ വേലക്കാരിയെ രണ്ടു ദിവസം കാണാതിരുന്നാൽ അവർ മടങ്ങി വരുമോ എന്ന ആശങ്ക സ്വാഭാവികമാണ്. അത്തരത്തിലുള്ള സംശയമാണു ദിലീപിനെ തിരിച്ചെടുക്കുന്നതുമായി ബന്ധപ്പെട്ട് തന്റെ ഭാഗത്തു നിന്നുണ്ടായതെന്നായിരുന്നു ഊർമിള ഉണ്ണി കോഴിക്കോട് പറഞ്ഞത്.

കോഴിക്കോട്ട് വൈക്കം മുഹമ്മദ് ബഷീറിന്റെ പേരില്‍ ഏര്‍പ്പെടുത്തിയ അക്ഷരപുരസ്‌കാരം ചടങ്ങില്‍ സംസാരിക്കുകയായിരുന്നു നടി. നടിയെ ആക്രമിച്ച സംഭവത്തിൽ ആര് പറയുന്നതാണ് ശരിയെന്ന് തനിക്കിതുവരെ മനസ്സിലായിട്ടില്ലെന്നും നടിക്ക് താൻ പിന്തുണ നൽകിയിരുന്നതായും ഊർമിള ഉണ്ണി മാധ്യമങ്ങളോട് വ്യക്തമാക്കി. യോഗത്തില്‍ ദിലീപിനെ തിരിച്ചെടുക്കണമെന്ന് പറയാന്‍ തനിക്ക് മാത്രമേ ധൈര്യം ഉണ്ടായിരുന്നുള്ളുവെന്നും ഊര്‍മിള ഉണ്ണി മാധ്യമങ്ങളോട് പറഞ്ഞു.