ക്വിഡിനെ ഇന്ത്യന്‍ വിപണി സ്വീകരിച്ചു; രണ്ടാഴ്ചക്കുള്ളില്‍ 25,000 ബുക്കിംഗ്
ബുധന്‍, 7 ഒക്‌ടോബര്‍ 2015 (10:12 IST)
ഇന്ത്യയില്‍ ചെറുകാറുകള്‍ക്ക് ലഭിക്കുന്ന സ്വീകരണം മനസിലാക്കിയ പ്രമുഖ ഫ്രഞ്ച് കാര്‍ നിര്‍മ്മാതാക്കളായ റെനോ പുതുതായി നിരത്തിലിറക്കുന്ന ഹാച്ച്ബാക്ക് മോഡല്‍ കാര്‍ ക്വിഡ് 12 ദിവസത്തിനുള്ളില്‍ 25,000 ബുക്കിംഗ്. ചെറും കുടുംബങ്ങളെ ലക്ഷ്യമാക്കി പുറത്തിറക്കിയ റെനോയുടെ പുതിയ ചെറുകാറിന്റെ വിലയാണ് എല്ലാവരെയും ആകര്‍ഷിച്ചത്. റെനോയും നിസാനും സംയുക്‍തമായി നിര്‍മിച്ച ക്വിഡിന് 2.56 ലക്ഷം മുതല്‍ 3.53 ലക്ഷം രൂപ വരെയാണ് വില.
മാരുതിയുടെ ആള്‍ട്ടോയോടും ഹ്യൂണ്ടായി ഇയോണിനോടും മത്സരിക്കാനാണ് ക്വിഡ് തയാറെടുക്കുന്നത്. എന്നാല്‍ ഈ രണ്ടു കാറുകളെക്കാളും കുറഞ്ഞ വിലയും ബുക്കിംഗ് കൂടാന്‍ കാരണമായതായി അധികൃതര്‍ അവകാശപ്പെടുന്നു.നിലവില്‍ സ്വീകരിച്ച ബുക്കിംഗില്‍ 40ശതമാനം 28 വയസില്‍ താഴെ പ്രായമുള്ള യുവാക്കളുടെയും 15ശതമാനം സ്ത്രീകളുടെയുമാണ്. മൂന്നു സിലിണ്ടര്‍ പെട്രോള്‍ എഞ്ചിനുള്ള റെനോയ്ക്ക് 5-സ്പീഡ് മാനുവല്‍ ഗിയര്‍ബോക്‌സുമുണ്ട്. ലിറ്ററിന് 25.17 കിലോമീറ്റര്‍ മൈലേജ് ലഭിക്കുമെന്നാണ് കമ്പനിയുടെ അവകാശവാദം.
കരുത്തിലും ഗ്ലാമറിലും ക്വിഡ് മറ്റ് ചെറുകാറുകളെ വെല്ലുമെന്ന് കമ്പനി അധികൃതര്‍ വ്യക്തമാക്കുന്നുണ്ട്. അഞ്ച് പേര്‍ക്ക് യാത്ര ചെയ്യാവുന്ന ക്വിഡ് മികച്ച യാത്രാസുഖം പകരുന്നുണ്ട്. കാറിനുള്ളിലെ സൌകര്യവും മികച്ച രീതിയിലാണ്. രാജ്യത്ത് ലഭ്യമായ പെട്രോള്‍ കാറുകളില്‍ ഏറ്റവും ഇന്ധനക്ഷമതയുള്ളതാണിത്. മാരുതി സുസുക്കിയുടെ ഓള്‍ട്ടോ കെ10, ഹ്യൂണ്ടായിയുടെ ഇയോണ്‍ എന്നിവയ്ക്ക് കനത്ത വെല്ലുവിളിയായിരിക്കും ക്വിഡിന്റെ വരവ്.
