കെടിഎമ്മിന്റെയും, ഹസ്‌വർണയുടെയും പ്രീമിയം സ്കൂട്ടറുകൾ ചേതക്കിന്റെ ശരീരത്തിൽ ഉയിർക്കൊള്ളും, ബജാജ് ഒരുങ്ങി തന്നെ !
ഒരുകാലത്ത് ഇന്ത്യൻ നിരത്തുകളിൽ നിറസാനിധ്യമായിരുന്ന പ്രിയ വാഹനം ചേതക്കിനെ ബജാജ് തിരികെ കൊണ്ടുവരുന്നു എന്ന വാർത്ത തന്നെ വലിയ സ്വീകാര്യത നേടിയിരുന്നു. ഇൽക്ട്രിക് സ്കൂട്ടറായാണ് ചേതക്കിന്റെ മടങ്ങി വരവ്. ഇപ്പോഴിതാ ചേതക്കിന്റെ പ്ലാറ്റ്ഫോമിൽ ബജാജിന്റെ പ്രീമിയം ബ്രാൻഡുകളായ കെടിഎമ്മിന്റെയും, ഹസ്‌വർണയുടെയും ഇരുചക്ര വാഹനങ്ങൾ പുറത്തിറക്കാനുള്ള തീരുമാനത്തിലാണ് ബജാജ്. കെടിഎം ബ്രാൻഡിൽ റേസിംഗ് സ്കൂട്ടറുകളും, ഹസ്‌വർണയിൽ പ്രീമിയം സ്കൂട്ടറുകളുമായിരിക്കും ബജാജ് വിപണിയിൽ എത്തിക്കുക.
പുതിയ ചേതകിനെ കെടിഎം ഡീലർഷിപ്പുകൾ വഴിയായിരിക്കും വിപണിയിൽ എത്തിക്കുക എന്ന് നേരത്തെ തന്നെ ബജാജ് വ്യക്തമാക്കിയിരുന്നു. ബജാജിന്റെ പുതിയ അർബണെറ്റ് ബ്രാൻഡിലാണ് ചേതക്ക് വിപണിയിലെത്തുന്നത്. അടുത്ത വർഷം ജനുവരിയോടെ വാഹനം വിപണിയിലെത്തും. പൂനെയിലെ ചകാൻ പ്ലാന്റിൽ ചേതക്ക് ഇലക്ട്രിക്കിന്റെ നിർമ്മാണം ബജാജ് നേരത്തെ ആരംഭിച്ചിരുന്നു.
ചേതക് എന്ന പേര് നൽകിയെങ്കിലും രൂപത്തിൽ പഴയ ചേതക്കുമായി വിദൂര സാമ്യം മാത്രമേ പുതിയ ഇലക്ട്രിക് ചേതക്കിനൊള്ളു. റെട്രോ ഡിസൈൻ ശൈലിയിലാണ് വാഹനത്തെ ഒരുക്കിയിരിക്കുന്നത്. സ്നാർട്ട്‌ഫോണുകളുമായി കണക്ട് ചെയ്യാവുന്ന ഒരു സ്മാർട്ട് ഇലക്ട്രിക് സ്കൂട്ടറായാന് ചേതക് ഇലക്ട്രിക് വിപണിയിൽ എത്തുക. സിറ്റി, സ്പോർട്ട്സ് എന്നിങ്ങനെ രണ്ട് റൈഡിംഗ് മോഡുകൾ ചേതക്കിൽ ഉണ്ടാവും
സിറ്റി മോഡിൽ 95 മുതൽ 100 കിലോമീറ്റർ വരെയും, സ്പോർട്ട്സ് മോഡിൽ 85 കിലോമീറ്ററും താണ്ടാൻ സ്കൂട്ടറിനാകും. IP67 റേറ്റിങ്ങുള്ള ഹൈടെക് ലിഥിയം ആയൺ ബാറ്ററിയാണ് ചേതക്കിൽ ഉണ്ടാവുക. എന്നാൽ വാഹനത്തിലെ ഇലക്ട്രിക് മോട്ടോർ സംബന്ധിച്ച വിവരങ്ങൾ കമ്പനി പുറത്തുവിട്ടിട്ടില്ല. പുതിയ ഇലക്ട്രിക് ചേതക്കിന്റെ വില ബജാജ് പ്രഖ്യാപിച്ചിട്ടില്ല എങ്കിലും ഒന്നര ലക്ഷത്തിൽ കൂടുതൽ വാഹനത്തിന് വില വരില്ല എന്ന് വ്യക്തമാക്കിയിട്ടുണ്ട്.
