ദേശങ്ങള്‍ക്കും സംസ്ക്കാരങ്ങള്‍ക്കും അതീതമായി ഉരുത്തിരിയുന്നതാണ് പ്രണയം. പ്രണയത്തിന് കണ്ണില്ല എന്ന പ്രയോഗത്തെ ശരിവയ്ക്കുന്ന പല പ്രണയ ബന്ധങ്ങളും നാം കാണാറുണ്ട്. ഇവനെങ്ങനെ അവളെ ഇഷ്ടമായി അല്ലെങ്കില്‍ അവള്‍ക്കെങ്ങനെ ഇവനെ ഇഷ്ടമായി, തുടങ്ങിയ ചോദ്യങ്ങള്‍ മിക്കവരിലും നിന്ന് ഉയരാറുണ്ട്.
പലപ്പോഴും ഗംഭീര സംഭവങ്ങളായി തുടങ്ങുന്ന പ്രണയബന്ധങ്ങള്‍ നിലനിര്‍ത്തിക്കൊണ്ടു പോവുന്നതില്‍ പ്രണയിതാക്കള്‍ പരാജയപ്പെട്ടു പോകുന്നത് കാണറുണ്ട്. ഹോ..എന്തൊക്കെ കലാപമുണ്ടാക്കി തുടങ്ങിയതാ ഇപ്പോള്‍ കണ്ടില്ലെ രണ്ടും രണ്ട് വഴിക്ക് എന്ന് പറയാന്‍ നാട്ടുകാരും.
ഒന്നാകാന്‍ പിറന്നവര്‍ എന്ന ലേബലോടെ തുടങ്ങിയിട്ട് എന്തുക്കൊണ്ട് ഇവര്‍ കലമുടച്ച് പിരിയുന്നു. രണ്ടുപേരും രണ്ട് ധ്രുവങ്ങളില്‍ ആയിപ്പോകുന്നതാണ് പലപ്പോഴും ഇതിനു കാരണം. ‘ എന്തുക്കൊണ്ട് എന്‍റെ മനസിനെ എന്നെ അവള്‍/അവന് മനസിലാക്കുന്നില്ല ’ എന്നു തുടങ്ങി ‘ നീ എന്‍റെ ജീവിതം തുലച്ചു ’ എന്നുവരെ എത്തുന്നു കുത്തുവാക്കുകള്‍.
ഇങ്ങനെ ഒരു ദുരന്തത്തിലേക്ക് എത്താതിരിക്കാന്‍ പ്രണയത്തിന്‍റെ ആ‍രംഭത്തിലെ ശ്രദ്ധിച്ചേ പറ്റൂ. ഇണയുടെ പ്രീതി പിടിച്ചു പറ്റാന്‍ സ്വന്തം താല്പര്യങ്ങളേയും ആഗ്രഹങ്ങളേയും മറച്ചു വച്ചുക്കൊണ്ടാണ് പലരും പെരുമാറുക. അവള്‍ക്ക്/അവന് ഇഷ്ടമല്ലാത്തതൊന്നും എനിക്കും ഇഷ്ടമല്ല അല്ലെങ്കില്‍ ഇണക്ക് ഇഷ്ടമുള്ളതെല്ലാം എനിക്കും ഇഷ്ടമാണ് എന്ന രീതിയില്‍ തുടങ്ങും. വസ്ത്രങ്ങളുടെ നിറങ്ങള്‍ മുതല്‍ ഗൌരവമുള്ള കാര്യങ്ങള്‍ വരെ ഈ ഇഷ്ടനിഷ്ടങ്ങളീല്‍ പെടും. പ്രണയത്തിനായി എന്ത് ത്യാഗത്തിനും തയ്യാറാണെന്ന് ന്യായീകരണവും ഉണ്ടല്ലൊ.
ഇവിടം മുതല്‍ തന്നെ പാളിച്ച തുടങ്ങുകയായി. യഥാര്‍ത്ഥ പെരുമാറ്റത്തില്‍ നിന്ന് മാറി ഒരഭിനയമായിരിക്കും പിന്നീടങ്ങോട്ട്. പ്രണയഭാജനത്തെ സന്തോഷത്തില്‍ ആറടിക്കാനുള്ള കസര്‍ത്തുകള്‍. നാളുകള്‍ കഴിയും തോറും പ്രണയം ശക്തമായിക്കൊണ്ടിരിക്കും. അതേസമയം തിരശ്ശീലക്ക് പിന്നില്‍ ഒളിപ്പിച്ച യഥാര്‍ത്ഥ ഇഷ്ടാനിഷ്ടങ്ങള്‍ ഓരോന്നായി പുറത്തുവരാന്‍ തുടങ്ങും.
FILE
FILE
സാഹചര്യം മാറാന്‍ തുടങ്ങുന്നു. സംഭാഷണരീതികളും മാറ്റങ്ങള്‍ക്ക് വഴങ്ങിക്കൊടുക്കും. ‘ നീയല്ലെ അന്നു പറഞ്ഞത് നിനക്ക് ഇത് ഇഷ്ടമാണെന്ന് ഇപ്പൊഴെന്താ ഇങ്ങനെ ’. യുദ്ധകാഹളം മുഴങ്ങിക്കഴിഞ്ഞു. ഇരുവര്‍ക്കും അവരവരുടേതായ വിശദീകരണങ്ങള്‍. ‘ഇത്രയും നാള് ഞാന്‍ എന്‍റെ ഇഷ്ടങ്ങള്‍ മാറ്റിവച്ചില്ലെ ഇപ്പോഴെങ്കിലും അവള്‍ക്ക്/അവന് അതൊന്ന് അംഗീകരിച്ചാല്ലെന്താ’. നിസാര കാര്യങ്ങളായ നിറവും ഐസ്ക്രീം ഒന്നുമാവില്ല ഇപ്പോള്‍ പ്രശനം. അതിലും വലിയ കാര്യങ്ങളിലേക്ക് കടന്നിട്ടുണ്ടാവും ഇരുവരും.
ഈ സ്വരച്ചേര്‍ച്ചയിലായ്മകള്‍ എങ്ങനെ ഒഴിവാക്കാം, ഒന്ന് ചിന്തിക്കാം അല്ലെ?
ഒരാളെ ഇഷ്ടപ്പെട്ട് അവരോട് പ്രണയാഭ്യര്‍ത്ഥന നടത്തുമ്പോള്‍ സത്യസന്ധതയും ആത്മാര്‍ത്ഥതയും പൂര്‍ണമായുംപാലിക്കുക. അവനവനോട് തന്നെയും പ്രണയിക്കുന്ന ആളോടും. സ്വന്തം ഇഷ്ടങ്ങളേയും താല്പര്യങ്ങളേയും മറച്ചുവയ്ക്കാതെ കാര്യങ്ങള്‍ തുറന്നു പറയുക. നിങ്ങള്‍ക്ക് ഇല്ലാത്ത ഗുണങ്ങള്‍ ഉണ്ടെന്നു വരുത്തി സ്നേഹം നേടിയെടുക്കാന്‍ ശ്രമിക്കരുത്. അത് നിലനില്‍ക്കുകയില്ല.
നിങ്ങളില്‍ ഒരു പ്രത്യേക കഴിവുള്ളതുക്കൊണ്ട് ഒരാള്‍ നിങ്ങളെ പ്രണയിക്കുകയാണെങ്കില്‍ അവര്‍ പ്രണയിക്കുന്നത് നിങ്ങളെയല്ല മറിച്ച് നിങ്ങളിലെ ആ കഴിവിനെ മാത്രമാണ്. അവര്‍ക്ക് ഒരു ചിരി സമ്മാനമായി നല്‍കി പിന്‍മാറുക.ഗുണങ്ങളും കുറവുകളും പരസ്പരം മനസ്സിലാക്കി വിട്ടുവീഴ്ചകള്‍ക്ക് തയ്യാറാവുക. ഇണയ്ക്ക് മേല്‍ തോന്നുന്ന അധികാരം പ്രണയത്തിന്‍റെ ഉപോത്പന്നമാണ്. ഇത് സ്വാര്‍ത്ഥതയായി പരിണമിക്കാതിരിക്കാന്‍ ശ്രമിക്കുക. അങ്ങനെയായാല്‍ പരസ്പര വിശ്വാസം തകരലായിരിക്കും ഫലം.
ഞാനാണ് ശരി എന്ന് ധാരണ പുലര്‍ത്തിക്കൊണ്ട് സ്വന്തം തീരുമാനങ്ങളെ കാമുകനൊ/കാമുകിക്കൊ മേല്‍ അടിച്ചേല്പിക്കതിരിക്കുക.എന്ത് തീരുമാനമെടുക്കുമ്പോഴും ഇണയുടെ അഭിപ്രായങ്ങള്‍ക്കും വില നല്‍കുക. എപ്പോഴും ഒരാളുടെ തീരുമാനങ്ങള്‍ക്ക് വില കല്‍പ്പിക്കാതിരുന്നാല്‍ ഭാവിയിലെ പ്രതികരണം ഒരുപക്ഷെ ബന്ധത്തെ തന്നെ തച്ചുടച്ചേക്കാം.
