കാന്‍പൂര്‍ ടെസ്റ്റില്‍ ഓണ്‍-ഫീല്‍ഡ് അംപയര്‍ നിതിന്‍ മേനോനുമായി ഇന്ത്യയുടെ രവിചന്ദ്രന്‍ അശ്വിന്‍ നടത്തിയ സംസാരം സോഷ്യല്‍ മീഡിയയില്‍ വൈറലാകുന്നു. ന്യൂസിലന്‍ഡ് ബാറ്റ് ചെയ്യുന്നതിനിടെയാണ് സംഭവം. 73-ാം ഓവര്‍ എറിയാനെത്തിയത് അശ്വിന്‍ ആണ്. ഇതിനിടെ അശ്വിന്റെ റണ്‍-അപ്പ് അംപയര്‍ നിതിന്‍ മേനോന് കാഴ്ച തടസമുണ്ടാക്കി. തനിക്ക് കൃത്യമായി കാര്യങ്ങള്‍ കാണുന്നില്ലെന്ന് നിതിന്‍ മേനോന് പറഞ്ഞു. ഇരുവരും തമ്മില്‍ നടന്ന രസകരമായ സംസാരം സ്റ്റംപ് മൈക്കിലൂടെ കേള്‍ക്കാമായിരുന്നു.
ഉടനെ ഇന്ത്യന്‍ നായകന്‍ അജിങ്ക്യ രഹാനെ ഇടപെട്ടു.
'അശ്വിന്‍ റണ്‍-അപ്പ് എടുക്കുന്നത് തെറ്റായ രീതിയില്‍ അല്ലല്ലോ? അദ്ദേഹം ഓഫ് ദ പിച്ച് അല്ല,' രഹാനെ പറഞ്ഞു.
'നിങ്ങള്‍ക്ക് കൃത്യമായി വിധിക്കാന്‍ കഴിയുന്നില്ലെങ്കില്‍ ഞാന്‍ ഡിആര്‍എസ് സംവിധാനം ഉപയോഗപ്പെടുത്താം. അതില്‍ കുഴപ്പമില്ല. കാരണം, ഈ ദിശയില്‍ നിന്ന് എറിയുമ്പോള്‍ എനിക്ക് കുറേ കൂടി നന്നായി ബൗള്‍ ചെയ്യാന്‍ സാധിക്കുന്നുണ്ട്. കാണാന്‍ സാധിക്കുന്നില്ലെങ്കില്‍ അത് ചിലപ്പോള്‍ നിങ്ങളുടെ പ്രശ്‌നമാകും. എന്റെ കുറ്റമല്ല,' അശ്വിന്‍ കൂട്ടിച്ചേര്‍ത്തു.
