ഇസ്‍ലാമിക് സ്റ്റേറ്റ് (ഐ എസ്) ഭീകരബന്ധത്തെത്തുടർന്ന് അഫ്ഗാൻ ജയിലിലായിരുന്ന നഷീദുൾ ഹംസഫർ ഡൽഹിയിൽ അറസ്റ്റിലായി. വയനാട് കല്പറ്റ മുണ്ടേരി സ്വദേശിയായ നഷീദുളിനെ ദേശീയ അന്വേഷണ ഏജൻസിയാണ് അറസ്റ്റുചെയ്തത്. കാബൂളിൽനിന്ന് ബുധനാഴ്ച ഡൽഹിയിലെത്തിയ ഉടൻ ഇയാളെ അറസ്റ്റുചെയ്യുകയായിരുന്നെന്ന് എൻ ഐ എ വക്താവ് പ്രസ്താവനയിൽ അറിയിച്ചു.
ഐ എസ് ബന്ധത്തിന്റെപേരിൽ അഫ്ഗാനിസ്താൻ പിടികൂടി ഇന്ത്യയ്ക്ക്‌ കൈമാറുന്ന ആദ്യ വ്യക്തിയാണിയാൾ. കാസർകോട്ടുനിന്ന് കാണാതായ അബ്ദുൾ റഷീദ് അബ്ദുള്ള, അഷ്‌ഫാഖ് മജീദ് എന്നിവർക്കൊപ്പം സാമൂഹിക മാധ്യമങ്ങളിലൂടെ ഐ എസ് ആശയങ്ങൾ പ്രചരിപ്പിച്ചെന്നതാണ് ഇയാൾക്കെതിരെയുള്ള കേസ്.
