മുപ്പത് വർഷങ്ങ‌ൾക്കു ശേഷം അവൾ ചരിത്രം കുറിച്ചു. മുംബൈയുടെ ആദ്യത്തെ ടെസ്റ്റ് ട്യൂബ് ശിശു ഹർഷ ചൗഡ ഷാ തിങ്കളാഴ്ച പൂർണ ആരോഗ്യമുള്ളൊരു കുഞ്ഞിന് ജന്മം നൽകി. 1986ൽ ആദ്യ ടെസ്റ്റ് ട്യൂബ് ശിശുവിനെ രാജ്യത്തിന് നൽകിയ അതേ വിദഗ്ദ്ദ ഡോക്ടർമാരുടെ ശുശ്രൂഷയിൽ തന്നെയായിരുന്നു ജസ്‌ലോക്ക് ആശുപത്രിയിൽ സിസേറിയൻ നടന്നത്. 3.18 കിലോ തൂക്കമുള്ള ആരോഗ്യമുള്ളൊരു കുഞ്ഞിനാണ് ഹർഷ ജന്മം നൽകിയത്.
2015 ലായിരുന്നു ദിവ്യപാൽ ഷാ മുംബൈയുടെ ആദ്യത്തെ ടെസ്റ്റ് ട്യൂബ് ശിശുവായ ഹർഷയെ വിവാഹം കഴിച്ചത്. ഗർഭകാലത്ത് ബുദ്ധിമുട്ടുകൾ ഉണ്ടാകുമെന്ന കാരണത്താൽ ഹർഷ ജോലി രാജിവെക്കുകയായിരുന്നുവെന്ന് ദിവ്യപാൽ അറിയിച്ചു. 1986ൽ ആദ്യത്തെ ടെസ്റ്റ് ട്യൂബ് ശിശുവിനെ സമ്മാനിച്ച ഡോക്ടർ ഇന്ദിര ഹിന്ദുജ തന്നെയാണ് ഹർഷയുടെ സിസേറിയനും നേതൃത്വം നൽകിയത്.
ഹർഷ ജനിച്ചപ്പോൾ അവരുടെ മാതാപിതാക്കളുടെ സന്തോഷം വളരെ വലുതായിരുന്നു. മാതാപിതാക്കൾ അനുഭവിച്ച അതേ സന്തോഷം തന്നെയാണ് ഇന്ന് ഹർഷയും അനുഭവിക്കുന്നതെന്ന് സിസേറിയനു നേതൃത്വം നൽകിയ ഡോക്ടർ ഇന്ദിര പറഞ്ഞു. യാദൃശ്‌ചികമായാണ് അവർ തങ്ങ‌ളുടെ അടുക്കൽ തന്നെ പ്രസവത്തിന് എത്തിയത്. ഇങ്ങനെയൊരു സിസേറിയനു ഭാഗമാകാൻ കഴിഞ്ഞതിൽ സന്തോഷമുണ്ടെന്ന് ഡോക്ടർ കുസും സാവേരി അറിയിച്ചു.
