കേരളത്തില്‍ പിണറായി വിജയന്റെ നേതൃത്വത്തിലുള്ള ഇടത് സര്‍ക്കാര്‍ മികച്ച ഭരണമാണ് കാഴ്ച വെക്കുന്നതെന്ന് സിനിമാ താരവും മുന്‍ എംപിയുമായ ജയപ്രദ. ആന്ധ്രയിലെ നേതാക്കളെപ്പോലെയുള്ളവരല്ല ഇവിടുത്തെ നേതാക്കള്‍. ഇവിടെയുള്ളവര്‍ക്ക് കുറച്ച് കൂടി ദീര്‍ഘവീക്ഷണമുണ്ട്. ബംഗാളുമായി കേരളത്തിന് സമാനതകളുണ്ടെങ്കിലും മമതയെപ്പോലെ എടുത്തുചാടി പ്രവര്‍ത്തിക്കുന്നവരല്ല, ഇവിടുത്തെ നേതാക്കളെന്നും സമകാലിക മലയാളത്തിന്റെ ഓണപ്പതിപ്പായ പ്രിയസഖിക്ക് അനുവദിച്ച അഭിമുഖത്തില്‍ ജയപ്രദ പറയുന്നു.
നിലവില്‍ ബിജെപിയില്‍ ചേരണമെന്നോ മറ്റേതെങ്കിലും പാര്‍ട്ടിയില്‍ ചേരണമെന്നോ പറയാന്‍ പറ്റുന്ന അവസ്ഥയിലല്ല താന്‍. അതേസമയം രാഷ്ട്രീയത്തില്‍ നിന്നും താന്‍ വിരമിച്ചിട്ടില്ലെന്നും ജയപ്രദ പറയുന്നു. പെട്ടെന്നായിരുന്നു സമാജ്‌വാദി പാര്‍ട്ടിയില്‍ നിന്നും പുറത്താകുന്നത്. കുടുംബവഴക്കിനിടയില്‍ തങ്ങള്‍ പെട്ടുപോവുകയായിരുന്നുവെന്നും അത് തങ്ങളെ വല്ലാതെ ബാധിച്ചുവെന്നും ജയപ്രദ പറഞ്ഞു. തനിക്ക് ആദരവുളളിടത്തേ നില്‍ക്കാന്‍ സാധിക്കൂ. അല്‍പ്പം സമയമെടുത്ത് തീരുമാനത്തിലെത്താമെന്നും അവര്‍ പറഞ്ഞു.
