കേരളത്തിലെ ക്രൈസതവ ശില്‍പ്പ-ചിത്ര കലകളിലെ പോര്‍ച്ചുഗീസ് സ്വാധീനം വെളിവാക്കുന്ന പ്രദര്‍ശന വസ്തുക്കളാണ് ഫോര്‍ട്ട് കൊച്ചിയിലെ ഇന്തോ-പോര്‍ച്ചുഗീസ് മ്യൂസിയത്തിന്‍റെ പ്രത്യേകത. ഇന്ത്യയുടെയും പോര്‍ച്ചുഗല്ലിന്‍റെയും ക്രിസ്തീയ കലാപാരമ്പര്യത്തിലേക്ക് ഈ മ്യൂസിയത്തിലെ കാഴ്ചകള്‍ വെളിച്ചം വീശുന്നു.
കൊച്ചി ബിഷപ്പായിരുന്ന ഡോ. ജോസ്ഫ് കുരീത്ര നടത്തിയ അശ്രാന്ത പരിശ്രമങ്ങളുടെ ഫലമായാണ് മ്യൂസിയം നിലവില്‍ വന്നത്. ഫോര്‍ട്ട് കൊച്ചിയിലും പരിസര പ്രദേശങ്ങളിലുമുള്ള പോര്‍ച്ചുഗീസ് സ്വാധീനത്തിന്‍റെ നേര്‍ക്കാഴ്ചയും കൂടിയാണ് ഇന്തോ- പോര്‍ച്ചുഗീസ് മ്യൂസിയം ഒരുക്കുന്നത്.
ഫോര്‍ട്ട് കൊച്ചിയിലെ ബിഷപ്പ് ഹൌസില്‍ തന്നെയാണ് മ്യൂസിയം. അഞ്ച് പ്രധാന വിഭാഗങ്ങളായി ഇതിനെ തരം തിരിച്ചിരിക്കുന്നു. രൂപതയ്ക്ക് കീഴിലെ പള്ളികളില്‍ നിന്നുള്ള വസ്തുക്കളാണ് ഇവിടെ പ്രാധാനമായും പ്രദര്‍ശിപ്പിച്ചിരിക്കുന്നത്. പതിനാറാം നുറ്റാണ്ടില്‍ തേക്ക് തടിയില്‍ നിര്‍മിച്ച് അള്‍ത്താര, ബിഷപ്പ് ഹൌസില്‍ നിന്നുള്ള തിരുവസ്ത്രം, പതിനേഴാം നൂറ്റാണ്ടില്‍ നിര്‍മ്മിച്ച വെള്ളികെട്ടിയ മരക്കുരിശ് തുടങ്ങിയവയാണ് ഇവിടെത്തെ പ്രധാന പ്രദര്‍ശന വസ്തുക്കള്‍.
വൈപ്പിന്‍ലെ ഔര്‍ ലേഡി ഓഗ് ഹോപ്പ് പള്ളി, സാന്താക്രൂസ് ദേവാലയം തുടങ്ങിയിടങ്ങളില്‍ നിന്നാണ് പ്രദര്‍ശന വസ്തുക്കളില്‍ കൂടുതലും ശേഖരിച്ചിരിക്കുന്നത്. കളോസ്തേ ഗുല്‍ബെന്‍‌കിയാന്‍ ഫൌണ്ടേഷനും മ്യൂസിയത്തിനായി പ്രദര്‍ശന വസ്തുക്കള്‍ നല്‍കിയിട്ടുണ്ട്.
തിങ്കളാഴ്ചയും പൊതു അവധി ദിവസങ്ങളിലും ഒഴികെ രാവിലെ പത്ത് മുതല്‍ വൈകുന്നേരം അഞ്ച് മണി വരെ പ്രവര്‍ത്തിക്കുന്ന മ്യൂസിയത്തിലേക്ക് എല്ലാ മാസത്തെയും ആദ്യ വ്യാഴാഴ്ചകളില്‍ പ്രവേശനം സൌജന്യമാണ്.
