കൂടുതല്‍ ശക്തമായ ആരോപണങ്ങളാണ് ഹൈക്കോടതിയില്‍ ജയരാജനെതിരെ സി ബി ഐ നല്കിയിരിക്കുന്ന എതിര്‍ സത്യവാങ്‌മൂലത്തിലുള്ളത്. പല മൃഗീയ കുറ്റകൃത്യങ്ങളിലും ജയരാജന് പങ്കാളിയാണെന്നും മനോജ് വധത്തിന്റെ ബുദ്ധികേന്ദ്രം ജയരാജനാണെന്നും സത്യവാങ്‌മൂലത്തില്‍ സി ബി ഐ പറയുന്നു. നാലുപേജുള്ള എതിര്‍ സത്യവാങ്‌മൂലമാണ് സി ബി ഐ കോടതിയില്‍ സമര്‍പ്പിച്ചത്.
നിയമത്തെ മറികടക്കാന്‍ ജയരാജന് ശ്രമിക്കുന്നെന്നും ജയരാജന്റെ അറസ്റ്റ് അനിവാര്യമെന്നും സി ബി ഐ പറഞ്ഞു. കതിരൂര്‍ മനോജ് വധക്കേസുമായി ബന്ധപ്പെട്ട് പി ജയരാജന്റെ മുന്‍കൂര്‍ ജാമ്യാപേക്ഷയില്‍ വാദം കേള്‍ക്കവേയാണ് സി ബി ഐ സത്യവാങ്‌മൂലം സമര്‍പ്പിച്ചത്. ജയരാജന് ജാമ്യം നല്കുന്നതില്‍ എതിര്‍പ്പുണ്ടെങ്കില്‍ അറിയിക്കാന്‍ സി ബി ഐയോട് ജസ്റ്റിസ് കെ ടി ശങ്കരനും ജസ്റ്റിസ് കെ പി ജ്യോതീന്ദ്രനാഥും ഉള്‍പ്പെട്ട ഡിവിഷന്‍ ബെഞ്ച് നിര്‍ദ്ദേശിച്ചിരുന്നു.
