കലാമണ്ഡലം പുരസ്കാരം ജയറാമിന്‌
കേരള കലാമണ്ഡലം ഏര്‍പ്പെടുത്തിയ പ്രഥമ വാദ്യകലാ പുരസ്ക്കാരത്തിന്‌ പ്രസിദ്ധ സിനിമാനടന്‍ ജയറാം അര്‍ഹനായി. എം.കെ.കെ നായരുടെ പേരില്‍ ഏര്‍പ്പെടുത്തിയ ഈ പുരസ്കാരം വാദ്യകലകളുടെ വളര്‍ച്ചയ്ക്കും പരിപോഷണത്തിനുമായി നല്‍കിയ സംഭാവനകള്‍ കണക്കിലെടുത്താണ്‌ ജയറാമിനെ ഈ പുരസ്കാരത്തിന്‌ അര്‍ഹനാക്കിയത്. 25,000 രൂപയും പ്രശസ്തി പത്രവും പൊന്നാടയും അടങ്ങുന്നതാണ്‌ പുരസ്കാരം.
കേരളത്തിന്‍റെ തനതു മേളമായ ചെണ്ടവാദനത്തെ പ്രോത്സാഹിപ്പിക്കുന്നതിനായി പ്രവര്‍ത്തിച്ചതിനു നല്‍കുന്ന ഈ അവാര്‍ഡ് നവംബര്‍ ഒമ്പതിനു വൈകിട്ട് നാലു മണിക്ക് കലാമണ്ഡലം കൂത്തമ്പലത്തില്‍ ചേരുന്ന സമ്മേളനത്തില്‍ വച്ച് കേരള ഗവര്‍ണര്‍ ജസ്റ്റിസ് പി.സദാശിവം സമ്മാനിക്കും. ചടങ്ങില്‍ സാംസ്കാരിക മന്ത്രി കെ.സി ജോസഫ് അദ്ധ്യക്ഷത വഹിക്കും.
