ശബരിമലയില്‍ ഭക്തജനത്തിരക്ക് വര്‍ധിച്ചു. ഇന്ന് രാവിലെ എട്ടുമണിക്ക് ശരംകുത്തിക്ക് അപ്പുറത്തേക്ക് നീണ്ട ക്യൂ പ്രത്യക്ഷപ്പെട്ടു. ഇന്നലെ രാത്രി ഹരിവരാസനം പാടി നട അടച്ച സമയത്ത് പതിനായിരത്തോളം പേര്‍ പതിനെട്ടാം പടി കയറുവാനുള്ള വരിയില്‍ ഉണ്ടായിരുന്നു. ഇവരെല്ലാം ഇന്ന് രാവിലെ വരെ വരിയില്‍ കാത്തുനിന്ന ശേഷമാണ് പതിനെട്ടാം പടി കയറി ദര്‍ശനം നടത്തിയത്. വടക്കേ നടയിലും ദര്‍ശനത്തിനുള്ള നീണ്ട നിരയാണ്.
തീര്‍ഥാടകരുടെ തിരക്ക് വര്‍ധിച്ചതിനാല്‍ ശബരിമല ഡ്യൂട്ടിക്ക് കൂടുതല്‍ പൊലീസിനെ വിന്യസിച്ചു. സന്നിധാനം, പമ്പ, നിലയ്ക്കല്‍ എന്നിവിടങ്ങളില്‍ ഇന്നലെ പുതിയ പൊലീസ് സംഘം ചുമതലയേറ്റു. തീര്‍ഥാടകര്‍ക്കായി എല്ലാവിധ സൗകര്യങ്ങളും പൊലീസ് ഒരുക്കുന്നുണ്ട്.
