കൊല്ലം: കൊല്ലം ഇളവൂരിൽ ഇത്തക്കര ആറ്റിൽ മരിച്ച നിലയിൽ കണ്ടെത്തിയ ആറുവയസുകാരി ദേവനന്ദയുടെ മൃതദേഹം വീട്ടുവളപ്പിൽ സംസ്കരിച്ചു. ദേവനന്ദയ്ക്ക് അന്ത്യോപചാരം അർപ്പിക്കുന്നതിനായി ആയിരങ്ങളാണ് എത്തിച്ചേർന്നത്. പെൺകുട്ടിയുടെ അമ്മയുടെ വീടായ ഇളവൂരിലും പെൺകുട്ടി പഠിച്ചിരുന്ന വാക്കനാട് സരസ്വതി വിദ്യാലയത്തിലും പൊതു ദർശനത്തിന് വച്ച ശേഷമാണ് മൃതദേഹം കുടവട്ടൂരിലെ വീട്ടുവളപ്പിൽ സംസ്കരിച്ചത്.
ആറിന്റെ അരികിലെ കുറ്റിക്കാടിനോട് ചേർന്ന് കമിഴ്ന്ന് കിടക്കുന്ന നിലയിലായിരുന്നു മൃതദേഹം. ദേവനന്ദയുടേത് മുങ്ങിമരണമാണ് എന്നാണ് പോസ്റ്റ്മോർട്ടം റിപ്പോർട്ടിലെ പ്രാഥമിക നിഗമനം. പെൺകുട്ടിയുടെ ആന്തരികാവയവങ്ങളിൽ ചെളിയും വെള്ളവും ഉണ്ടായിരുന്നു എന്ന് പോസ്റ്റ്മോർട്ടം റിപ്പോർട്ടിൽ പറയുന്നു. ദേവനന്ദ പുഴയിലേക്ക് കാൽ വഴുതി വീണതാകാം എന്നാണ് അനുമാനം.
