സിപിഎം പ്രവര്‍ത്തകന്‍ വെട്ടേറ്റു മരിച്ചു; ഹര്‍ത്താലിന് സിപിഎം ആഹ്വാനം ചെയ്തു
തിങ്കള്‍, 4 മെയ് 2015 (08:55 IST)
തൃശൂര്‍ കണ്ണമ്പ്ര പുതുക്കോട് ആര്‍ എസ് എസ് - സി പി എം സംഘര്‍ഷത്തെ തുടര്‍ന്ന് സി പി എം പ്രവര്‍ത്തകന്‍ വെട്ടേറ്റു മരിച്ചു. സംഭവത്തെ തുടര്‍ന്ന് ആലത്തൂര്‍ താലൂക്കില്‍ തിങ്കളാഴ്ച സി പി എം ഹര്‍ത്താല്‍ ആണ്.
കാരപ്പൊറ്റ മാട്ടുവഴി വിജയനാണ് (43) വെട്ടേറ്റു മരിച്ചത്. വീട്ടിലേക്ക് നടന്നുവരുന്ന വഴിയില്‍ അക്രമിസംഘം ഒളിഞ്ഞിരുന്ന് മാരകായുധം ഉപയോഗിച്ച് വെട്ടുകയായിരുന്നു. ഞായറാഴ്ച വൈകുന്നേരം ആറിനായിരുന്നു സംഭവം.
തൃശൂരിലെ സ്വകാര്യ ആശുപത്രിയില്‍ പ്രവേശിപ്പിച്ച വിജയന്‍ രാത്രി പതിനൊന്നരയോടെയാണ് മരണപ്പെട്ടത്.
സംഘര്‍ഷത്തെ തുടര്‍ന്ന് സി പി എം പ്രവര്‍ത്തകരെന്ന് പറയപ്പെടുന്ന ഒരു സംഘം കാരപ്പൊറ്റ ചന്ദ്രന്റെ വീട് ആക്രമിച്ച് ഗൃഹോപകരണങ്ങള്‍ തല്ലിത്തകര്‍ത്തു.
അക്രമിസംഘം ആര്‍ എസ് എസ് പ്രവര്‍ത്തകനായ മിഥുനെ (22) മര്‍ദിച്ചതായി പരാതിയുണ്ട്. ഇയാളെ ആലത്തൂരിലെ സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്.
