കോഴിക്കോട് ജില്ലാ ജയിലില്‍ നിന്ന് ഫോണ്‍ കണ്ടെടുത്തു
ശനി, 7 ഡിസംബര് 2013 (14:14 IST)
PRO
PRO
ടി പി ചന്ദ്രശേഖരന്‍ വധക്കേസ് പ്രതികളെ പാര്‍പ്പിച്ച കോഴിക്കോട് ജില്ലാ ജയിലില്‍ നിന്ന് ഫോണ്‍ കണ്ടെടുത്തു. പ്രതികള്‍ ഉപയോഗിക്കുന്ന കക്കൂസിന്റെ പൈപ്പില്‍ നിന്നാണ് ഫോണ്‍ കണ്ടെത്തിയത്. പൈപ്പ് വൃത്തിയാക്കുന്നതിനിടെയാണ് ഫോണ്‍ കണ്ടെത്തിയത്.
സിം ഇല്ലാത്ത നോക്കിയ 101 മൊബൈല്‍ ഫോണ്‍ ആണ് കണ്ടെത്തിയത്. സെപ്റ്റിക് ടാങ്കിലേക്കുള്ള പൈപ്പിന്റെ തടസ്സം നീക്കുന്നതിനിടെയാണ്.
നേരത്തെ ജയിലിനുള്ളില്‍ റെയ്ഡ് നടത്തി 12 ബാറ്ററികളും എട്ട് ചാര്‍ജ്ജറുകളും കണ്ടെടുത്തിരുന്നു.
ചട്ടങ്ങള്‍ കാറ്റില്‍ പറത്തി ടി പി വധക്കേസ് പ്രതികള്‍ ജയിലില്‍ ഫേസ്ബുക്ക് അടക്കമുള്ള സംവിധാനങ്ങള്‍ ഉപയോഗിക്കുന്നു എന്ന വാര്‍ത്ത വന്‍ വിവാദമായിരുന്നു. 2012 ജൂണ്‍ മുതല്‍ 2013 ഡിസംബര് വരെ വിവിധ സമയങ്ങളിലായാണ് ടി പി വധക്കേസിലെ ആദ്യ ഏഴ് പ്രതികളില്‍ ടി കെ രജീഷ് ഒഴികെയുള്ളവര്‍ ഫേസ് ബുക്കില്‍ അക്കൗണ്ട് തുറന്നത്. കൊടി സുനിയും കിര്‍മാണി മനോജും ഉള്‍പ്പെടെ ആറ് പേരാണ് ഫേസ്‌ബുക്കില്‍ സജീവമായ പ്രതികള്‍. പ്രതികള്‍ ജയിലില്‍ ബര്‍മുഡയും കൂളിംഗ് ഗ്ലാസും ഉപയോഗിക്കുന്നുവെന്നും ഫെയ്‌സ് ബുക്ക് ചിത്രങ്ങളില്‍ നിന്ന് വ്യക്തമായിരുന്നു.
കിര്‍മാണി മനോജാണ് ഏറ്റവും കൂടുതല്‍ ഫോട്ടോകള്‍ പോസ്റ്റ് ചെയ്തത്. 547 ഫോട്ടോകളും മൊബൈല്‍ വഴിയാണ് അപ്‌ലോഡ് ചെയ്തത്. ആറു പേരില്‍ ഫേസ് ബുക്കില്‍ ഏറ്റവും കൂടുതല്‍ സുഹൃത്തുക്കള്‍ ഉള്ളതും മനോജ് കിര്‍മാണിക്കാണ്. 2013 സെപ്തംബര്‍ 14ന് മാവേലിയുടെ വേഷത്തില്‍ സുമേഷിനൊപ്പം കിര്‍മാണി മനോജ് നില്‍ക്കുന്ന ഫോട്ടോ പോസ്റ്റ് ചെയ്തതും കിര്‍മാണി തന്നെയാണ്.
