സംസ്ഥാന ആര്‍ എസ് പിയില്‍ പൊട്ടിത്തെറി. ദേശീയ സമ്മേളനം ഒരു വിഭാഗം നേതാക്കള്‍ ബഹിഷ്കരിക്കും. തദ്ദേശ സ്വയം‌ഭരണ സ്ഥാപനങ്ങളിലേക്കുള്ള തെരഞ്ഞെടുപ്പില്‍ കനത്ത തിരിച്ചടിയുണ്ടായിട്ടും യു ഡി എഫിനൊപ്പം നില്‍ക്കുന്നതാണ് പ്രതിഷേധത്തിന് കാരണം. 10 സംസ്ഥാന നേതാക്കള്‍ ദേശീയ സമ്മേളനത്തില്‍ പങ്കെടുക്കില്ല. കൊല്ലത്തുനിന്നുള്ള എട്ട് സംസ്ഥാന സമിതിയംഗങ്ങളും തിരുവനന്തപുരത്തുനിന്നുമുള്ള രണ്ട് അംഗങ്ങളുമാണ് സമ്മേളനത്തില്‍ പങ്കെടുക്കില്ലെന്ന് തീരുമാനിച്ചിരിക്കുന്നത്.
എന്നാല്‍ ഓരോ സംസ്ഥാനത്തെയും സാഹചര്യമനുസരിച്ച് ആര്‍ എസ് പിക്ക് പ്രവര്‍ത്തിക്കാമെന്ന് ദേശീയതലത്തില്‍ ഒരു പ്രമേയം നിലനില്‍ക്കുന്നുണ്ട്. ഇതാണ് സംസ്ഥാനത്ത് ആര്‍ എസ് പി ഔദ്യോഗിക നേതൃത്വത്തിന് പിടിവള്ളിയായിരിക്കുന്നത്. കേരളത്തില്‍ വ്യത്യസ്തമായ സാഹചര്യമാണ് നിലനില്‍ക്കുന്നതെന്നും അതിനാല്‍ യു ഡി എഫിനൊപ്പം തുടരാമെന്നുമാണ് സംസ്ഥാന നേതൃത്വത്തിന്റെ നിലപാട്.
