ആലുവ സബ് ജയിലില്‍ കഴിയുന്ന നടന്‍ ദിലീപിനെ കാണാന്‍ ജയറാം, എംഎല്‍എയും നടനുമായ ഗണേഷ് കുമാര്‍, സംവിധായകന്‍ രഞ്ജിത്ത് എന്നിങ്ങനെയുള്ള പ്രമുഖരുടെ ഒഴുക്കായിരുന്നു കഴിഞ്ഞ ദിവസങ്ങളില്‍. തിരുവോണ നാളില്‍ ഓണക്കോടിയുമായി ജയറാം ജയിലിലെത്തിയപ്പോള്‍ ആക്രമണത്തിന് ഇരയായ പെണ്‍കുട്ടിക്ക് പ്രസ്തുതദിവസം അതിഥികളാരും ഉണ്ടായിരുന്നില്ല. ഓണക്കോടിയുമായി ആരും സ്‌നേഹം പങ്കുവെയ്ക്കാനുമെത്തിയില്ല. ജയിലേക്കുള്ള ഈ കൂട്ട തീര്‍ത്ഥയാത്രയില്‍ ഇപ്പോള്‍ എല്ലാവരും ഭീതിയിലാണ്.
എന്നാല്‍ സംവിധായകന്‍ വിനയന്‍, നടി സജിതാ മഠത്തില്‍ തുടങ്ങിയവര്‍ സിനിമാക്കാരുടെ നടപടിയെ വിമര്‍ശിച്ച് രംഗത്തെത്തിയിരുന്നു. ഇപ്പോള്‍ ഇതാ ദിലീപിന് പിന്തുണ അറിയിക്കാന്‍ ജയിലിലേക്ക് പോയവര്‍ക്കുനേരെ വിമര്‍ശനവുമായി തിരക്കഥാകൃത്തും വിമന്‍ കളക്ടീവ് ഇന്‍ സിനിമാ ഭാരവാഹിയുമായ ദീദി ദാമോദരന്‍ രംഗത്ത് വന്നിരിക്കുന്നു. കുറ്റാരോപിതനുള്ള പിന്തുണയുമായി ചലച്ചിത്ര പ്രവർത്തകരുടെ ജയിലിലേക്കുള്ള കൂട്ടതീർത്ഥയാത്രയിൽ അത്ഭുതപ്പെടാൻ ഒന്നുമില്ലെന്ന് ദീദി ഫേസ്ബുക്കിലൂടെ പറയുന്നത്.
