നാട്ടിന്‍പുറങ്ങളില്‍ കണ്ടുവരുന്ന ഒരു സസ്യമാണ്‌ കീഴാർ നെല്ലി. ആളൊരു കുഞ്ഞനാണെങ്കിലും നിരവധി ഔഷധ ഗുണങ്ങളുള്ള ഒരു ചെടിയാണിത്. എങ്കിലും ഇന്നത്തെ തലമുറയിലെ പലര്‍ക്കും ഇതിന്റെ ഗുണങ്ങളെക്കുറിച്ച് അറിയില്ല എന്നതാണ് വാസ്തവം. യുഫോർബിക്കാ എന്ന സസ്യകുടുംബത്തിലെ ഒരു അംഗമാണ് കീഴാര്‍ നെല്ലി. കീഴാര്‍ നെല്ലിയുടെ ഇല മാത്രമല്ല അതിന്റെ പൂവും ഔഷധമായി ഉപയോഗിക്കാറുണ്ട്.
മഞ്ഞപ്പിത്തം, പനി എന്നീ രോഗങ്ങള്‍ മാറ്റാന്‍ കീഴാര്‍ നെല്ലി ഉപയോഗിക്കാറുണ്ട്. ഇതിലടങ്ങിയിരിക്കുന്ന ഫിലാന്തിൻ, ഹൈപ്പോ ഫില്ലാന്തിൻ എന്നീ രാസവസ്തുക്കളാണ്‌ മഞ്ഞപ്പിത്തം കുറയ്ക്കുവാൻ സഹായിക്കുന്ന ഘടകങ്ങൾ. കീഴാര്‍ നെല്ലി ഇടിച്ച് പിഴിഞ്ഞ നീര് പശുവിന്‍ പാലില്‍ ചേര്‍ത്ത് കഴിച്ചാലാണ് മഞ്ഞപ്പിത്തം മാറുക. മാത്രമല്ല മൂത്രാശയരോഗങ്ങള്‍ക്കും ഉത്തമമായ ഒന്നാണ് കീഴാര്‍ നെല്ലി.
കീഴാർ നെല്ലി എണ്ണ കാച്ചി തലയില്‍ തേക്കുന്നതിലൂടെ തലമുടി വളരും. ദഹന സംബന്ധമായ പല പ്രശനങ്ങള്‍ക്കും ഉദരരോഗങ്ങളെ ചെറുക്കാനും കീഴാര്‍ നെല്ലി സഹായകമാണ്. കീഴാര്‍നെല്ലിയുടെ നീര് തേങ്ങാ പാലില്‍ ചേര്‍ത്ത് കഴിച്ചാല്‍ കരള്‍ രോഗങ്ങളെ ശമിപ്പിക്കാം. പല്ലിന്റെ ബലക്ഷയം മാറാൻ കീഴാർ നെല്ലി ദിവസവും വായിലിട്ട് ചവച്ചാല്‍ മതി. പ്രമേഹം മാറ്റാൻ ഏറ്റവും ഉത്തമമായ ഒന്നാണ് കീഴാര്‍ നെല്ലി.
