കരാർ,കാലാവധി,പ്രതിഫലം എന്നിവ സംബന്ധിച്ച ചർച്ചകളാണ് പുരോഗമിക്കുന്നത്. 2023 വരെയാണ് ബയേണുമായി ലെവൻഡോസ്‌കിക്ക് കരാറുള്ളത്. ലാ ലീഗ കളിക്കുക എന്നത് തന്റെ ആഗ്രഹങ്ങളിലൊന്നാണെന്ന് നേരത്തെ തന്നെ പോളണ്ട് താരം വ്യക്തമാക്കിയിരുന്നു. 2014ലാണ് ബൊറൂസിയ ഡോർട്ട്മു‌ണ്ട് താരമായ ലെവൻഡോസ്കി ബയേണിലെത്തുന്നത്.
ഈ സീസണിൽ ഇതുവരെ 40 മത്സരങ്ങളിൽ നിന്ന് 46 ഗോളുകൾ ലെവൻഡോസ്കി ബയേണിനായി നേടി കഴിഞ്ഞു. ന്യൂ കാമ്പിൽ ഇതേ പ്രകടനം ലെവൻഡോസ്കി ആവർത്തിക്കുമെന്ന പ്രതീക്ഷയിലാണ് ബാഴ്‌സ ആരാധകർ. നേരത്തെ എർലിങ് ഹാലൻഡിനെ ടീമിലെത്തിക്കാനുള്ള ശ്രമത്തിലായിരുന്നു ബാഴ്‌സ. ലെവൻഡോസ്കി ടീമിലെത്തുകയാണെങ്കിൽ ഈ നീക്കത്തിൽ നിന്ന് ബാഴ്‌സ പിന്തിരിയാനാണ് സാധ്യതയേറെയും.
