ഫുട്‌ബോള്‍ ലോകകപ്പ് യോഗ്യതാ മത്സരത്തില്‍ അര്‍ജന്റീനയ്ക്ക് ആദ്യ തോല്‍വി. ഉറുഗ്വായിക്കെതിരെ എതിരില്ലാത്ത രണ്ട് ഗോളുകള്‍ക്കാണ് അര്‍ജന്റീന തോറ്റത്. ഖത്തര്‍ ലോകകപ്പ് ഹീറോ ലയണല്‍ മെസി കളത്തിലിറങ്ങിയിട്ടും അര്‍ജന്റീനയ്ക്ക് ഒരു ഗോള്‍ പോലും തിരിച്ചടിക്കാനായില്ല. മത്സരത്തിന്റെ 41-ാം മിനിറ്റിലും 87-ാം മിനിറ്റിലുമാണ് ഉറുഗ്വായ് അര്‍ജന്റീനയുടെ വല കുലുക്കിയത്. റൊണാള്‍ഡ് അറൗഹോ, ഡാര്‍വിന്‍ ന്യൂനസ് എന്നിവരാണ് ഉറുഗ്വായിയുടെ സ്‌കോറര്‍മാര്‍.
മറ്റൊരു യോഗ്യത മത്സരത്തില്‍ ശക്തരായ ബ്രസീല്‍ കൊളംബിയയോടും തോല്‍വി വഴങ്ങി. ലോകകപ്പ് യോഗ്യതാ മത്സരത്തിലെ ബ്രസീലിന്റെ തുടര്‍ച്ചയായ രണ്ടാം തോല്‍വിയാണിത്. 2-1 നാണ് ബ്രസീല്‍ കൊളംബിയയോട് തോറ്റത്. നാലാം മിനിറ്റില്‍ ഗബ്രിയേല്‍ മാര്‍ട്ടിനെല്ലിയിലൂടെ ബ്രസീല്‍ ആണ് ആദ്യ ഗോള്‍ നേടിയത്. എന്നാല്‍ 75, 79 മിനിറ്റുകളില്‍ ലൂയിസ് ഡയസിലൂടെ കൊളംബിയ മുന്നിലെത്തി.
