ആട് 3യുടെ കഥ കേള്‍ക്കാന്‍ ചിത്രത്തിലെ പ്രധാനപ്പെട്ട താരങ്ങളെല്ലാം ഒത്തുകൂടിയിരിക്കുകയാണ്. സൈജു കുറുപ്പാണ് ഈ വിവരം പുറത്തുവിട്ടത്. ”ആട് 3യുടെ നറേഷന് സെക്ഷനിലേക്ക് കടുക്കുകയാണ്.. അപ്‌ഡേറ്റുകള്‍ ഉടന്‍. സോമനും സേവ്യറിനുമൊപ്പം” എന്ന ക്യാപ്ഷനോടെയാണ് സൈജു സ്‌ക്രിപ്റ്റ് പിടിച്ചിരിക്കുന്ന ചിത്രം പങ്കുവച്ചത്. സുധി കോപ്പയും സണ്ണി വെയ്‌നുമാണ് സൈജുവിനൊപ്പം ചിത്രത്തിലുള്ളത്.
ചിത്രത്തിലെ മറ്റ് താരങ്ങളും സ്റ്റോറി നറേഷന് വേണ്ടി എത്തിയിരുന്നു. സൈജുവിനും സുധിക്കുമൊപ്പം, സംവിധായകന്‍ മിഥുന്‍ മാനുവല്‍ തോമസ്, ചിത്രത്തിന്റെ നിര്‍മ്മാതാവും നടനുമായ വിജയ് ബാബു, ധര്‍മജന്‍, ബിജുക്കുട്ടന്‍ ഉള്‍പ്പടെയുള്ളവരും കഥ കേള്‍ക്കാനെത്തി. ജയസൂര്യയാണ് ചിത്രത്തിലെ നായക കഥാപാത്രത്തെ അവതരിപ്പിക്കുന്നത്.
2015ല്‍ ആണ് ‘ആട്: ഒരു ഭീകര ജീവിയാണ്’ എന്ന പേരില്‍ ആദ്യ ഭാഗം എത്തിയത്. സിനിമ തിയേറ്ററില്‍ ഫ്‌ളോപ്പ് ആയെങ്കിലും ടിവിയില്‍ എത്തിയപ്പോള്‍ സ്വീകാര്യത നേടുകയായിരുന്നു. 2017ല്‍ ആണ് ആട് 2 എന്ന പേരില്‍ രണ്ടാം ഭാഗം എത്തിയത്. ഈ ചിത്രം 2017ല്‍ ഏറ്റവും വലിയ കളക്ഷന്‍ നേടിയ മലയാള ചിത്രങ്ങളിലൊന്നായിരുന്നു. ഫ്രൈഡേ ഫിലിം ഹൗസിന്റെ ബാനറിലാണ് ചിത്രം ഒരുങ്ങുന്നത്.
