ലോകത്തെ ഏറ്റവും രമണീയമായ വിനോദ സഞ്ചാര കേന്ദ്രങ്ങളില് ഒന്നാണ് മാലദ്വീപ്. മാലദ്വീപ് അല്ലെങ്കില് മാല്ദ്വീപ് ഐലന്ഡ്സ് എന്ന രാജ്യത്തിന്റെ ഔദ്യോഗിക പേര് റിപബ്ലിക് ഓഫ് മാല്ദ്വീപ്സ് എന്നാണ്.
ലക്ഷദ്വീപ് കടലില് ശ്രീലങ്കയുടെ തെക്ക് പടിഞ്ഞാറായി 700 കിലോമീറ്റര് അകലെയാണ് ഈ രാജ്യം. ലക്ഷദ്വീപുകള്ക്ക് തെക്കുമാറിയുള്ള ചെറിയ ദ്വീപുസമൂഹമാണ് ഇത്.സ്വതന്ത്ര ചിന്താഗതിക്കാരായ സുന്നി മുസ്ലിങ്ങള് താമസിക്കുന്ന രാജ്യമായ മാലദ്വീപില് മൂന്നു ലക്ഷമാണ് ജനസംഖ്യ.തിരുവനന്തപുരത്തുനിന്നും മലദ്വീപിലേക്ക് എന്നും വിമാനമുണ്ട്.
കടല്ത്തടാകങ്ങള് ഉള്ക്കൊള്ളുന്ന വൃത്താകൃതിയിലുള്ള 26 വന്തുരുത്തുകള് (അറ്റോളുകള്) കൂടിച്ചേര്ന്നതാണ് ഈ രാജ്യം. മൊത്തം 1192 ചെറു തുരുത്തുകള് ഇവിടെയുണ്ടെങ്കിലും 250 എണ്ണം മാത്രമാണ് ആള്വാസമുള്ളത്.ആകാശത്ത് നിന്നു നോക്കിയാല് ഒരാളുടെ മുഖവും കോളറും ഷര്ട്ടുമടങ്ങുന്ന നെഞ്ചുഭാഗവും പോലെ തൊന്നിക്കും മലദ്വീപ് സമൂഹം
1153 ല് ഈ ദ്വീപുസമൂഹം കണ്ടെത്തുമ്പോള് ഇവിടെ ബുദ്ധമതക്കാരായിരുന്നു ഉണ്ടായിരുന്നത്. അതിനു മുമ്പ് താമസക്കാര് ഹിന്ദുക്കള് ആയിരുന്നിരിക്കണം. 1153 ന് ശേഷമാണ് ഇസ്ലാം മതം അവിടെയെത്തുന്നത്.
1558 ല് പോര്ച്ചുഗീസുകാരുടെയും 1654 ഡച്ചുകാരുടെയും അധീനത്തിലായിരുന്ന മാലിദ്വീപ് 1887 ല് ബ്രിട്ടീഷുകാരുടെ കൈയിലായി. 1968 ലാണ് ബ്രിട്ടനില് നിന്നും രാജ്യം സ്വതന്ത്രമാവുന്നത്. സുല്ത്താനേറ്റായിരുന്ന ഈ രാജ്യം അന്നു മുതല് റിപബ്ലിക്കായി മാറി.
വലിപ്പത്തിലും ജനസംഖ്യയിലും ഏഷ്യയിലെ ഏറ്റവും ചെറിയ രാജ്യമാണിത്. ലോകത്തിലെ ഏറ്റവും ചെറിയ മുസ്ലീം രാജ്യവും ഇതുതന്നെ. ലോകത്ത് ഏറ്റവും താഴ്ന്ന ഭൂതലമുള്ള പ്രദേശവും ഇതാണ്.
സംസ്കൃതത്തില് ദ്വീപുകളുടെ മാല എന്നര്ത്ഥം വരുന്ന മാലദ്വീപയില് നിന്നാണ് മാല്ദീവ്സ് എന്ന പേരുണ്ടായത് എന്നനുമാനിക്കാം. മറ്റൊന്ന് മഹിളദ്വീപ എന്ന സ്ത്രീകളുടെ ദ്വീപ് എന്ന വാക്കില് നിന്നും വന്നതാകാനും വഴിയുണ്ട്. അറബിയില് നിന്നുള്ള മഹല് ദിബിയത്ത് എന്ന കൊട്ടാരദ്വീപില് നിന്നാണ് മാല്ദീവ്സ് എന്ന പേരുണ്ടായത് എന്ന് കരുതുന്നവരും ഉണ്ട്.
വിനോദസഞ്ചാരമാണ് ഈ ദ്വീപസമൂഹത്തിലെ പ്രധാന വരുമാന മാര്ഗ്ഗം. പ്രകൃതി സൌന്ദര്യം തുളുമ്പി നില്ക്കുന്നതാണ് ഇവിടത്തെ ഓരോ ദ്വീപും.