ജയന്‍-വേര്‍പാടിന്‍റെ വേദന ജയന

ജയന്‍റെ മരണാനന്തര ജീവിതത്തിന് 28വര്‍ഷം തികയുകയാണ്. 1980 നവംബര്‍ 16 ന് വൈകുന്നേരം സാഹസികമായ ഒരു രംഗത്തിന്‍റെ ചിത്രീകരണത്തിനിടയില്‍ ജയന്‍ അന്തരിച്ചിട്ട് 2008 നവംബര്‍ 16 ന് 28 വര്‍ഷം തികയുന്നു.ജയന്‍ ജീവിച്ചിരുന്നുവെങ്കില്‍ ഇപ്പോള്‍ 70 വയസ്സാകുമായിരുന്നു. 1938 ല്‍ കൊല്ലത്തെ തേവള്ളിയിലായിരുന്നു ജനനം
മലയാള നായക സങ്കല്‍പ്പത്തിന് പൌരുഷത്തിന്‍റെയും സാഹസികതയുടെയും പുതിയൊരു മുഖം കൂടി സമ്മാനിച്ച കൃഷ്ണന്‍ നായര്‍ എന്ന ജയന്‍ .വെറും ആറു വര്‍ഷം മാത്രം സിനിമയില്‍ അഭിനയിച്ച് ഇത്രയേറെ ആരാധ്യനായ നടന്‍ വേറെയുണ്ടാവില്ല-ലോക സിനിമയില്‍ പോലും-ഒരു പക്ഷെ ബ്രൂസ്‌ലീ മാത്രമായിരിക്കും ഒരപവാദം.

മലയാള സിനിമയില്‍ സത്യന്‍ കഴിഞ്ഞാല്‍ കരുത്തുറ്റ ശരീരമുള്ള നായക നടന്‍ ജയന്‍ മാത്രമായിരുന്നു. മുഖത്തിന്‍റെയും ശബ്ദത്തിന്‍റെയും മാത്രമല്ല ശരീര സൗന്ദര്യത്തിന്‍റെയും പൗരുഷം ജയന്‍ സിനിമയിലേക്ക് ആവാഹിച്ചു.

മലയാള സിനിമാ രംഗത്ത് അനുകര്‍ത്താക്കളെ ഉണ്ടാക്കിയെടുക്കാന്‍ കഴിഞ്ഞ ഏക നടന്‍ ജയന്‍ ആയിരുന്നു. ജയന്‍റെ നില്‍പ്പും നടപ്പും വാക്കും നോക്കും വസ്ത്രധാരണവുമെല്ലാം എത്രയോ പേര്‍ സ്വന്തമാക്കി കൊണ്ടു നടന്നു.

അല്‍പം കാലത്തെ അഭിനയം കൊണ്ട് ജയനെ യുവാക്കളുടെ പ്രിയ താരമാക്കിയ കാര്യങ്ങള്‍ എന്തല്ലാമായിരിക്കാം. വില്ലനായി തുടങ്ങിയ കാലത്തുപോലും അദ്ദേഹത്തെ ജനങ്ങള്‍ ഇഷ്ടപ്പെട്ടുപോയി.2ആകാരവടിവ് ആയിരുന്നു പ്രധാന കാരണം. പിന്നെ സാഹസികതയും ധീരതയും ഡ്യൂപ്പില്ലാതെ അഭിനയിക്കാന്‍ കാണിച്ച ചങ്കൂറ്റം.

കേമനായ നടനായിരുന്നു ജയന്‍ എന്നാരും പറയില്ല. എന്നാലും ചുരുക്കം ചില സിനിമകളില്‍ അദ്ദേഹം അവതരിപ്പിച്ച വ്യത്യസ്ത കഥാപാത്രങ്ങള്‍ ജയന്‍റെ സിദ്ധികളെ തെല്ലൊന്ന് അനാവരണം ചെയ്യാതിരുന്നില്ല.

ജയന്‍റെ ചിരിക്ക് ഒരാകര്‍ഷകത്വം ഉണ്ടായിരുന്നു. വലിപ്പമുള്ള ആ ശരീരത്തിലെ മുഖത്തിനും ഉണ്ടായിരുന്നു ഒരു നിഷ്കളങ്കത. ജയന്‍റെ ചിരിയിലെവിടെയോ വേദനയുടെ പരാഗങ്ങള്‍ പറ്റിക്കിടന്നിരുന്നു.

സംഭാഷണ ശൈലിയിലെ സവിശേഷതയാണ് ജയനെ മറ്റുള്ളവരില്‍ നിന്നും മാറ്റി നിര്‍ത്തിയിരുന്ന പ്രധാന ഘടകം. പില്‍ക്കാലത്ത് മിമിക്രിക്കാരെ തുണച്ചതും പതിഞ്ഞുറച്ച ഈ സംഭാഷണ രീതിയായിരുന്നു.

കോളിളക്കം എന്ന വിജയാനന്ദ് ചിത്രത്തിലെ അവസാന രംഗം ചിത്രീകരിക്കുന്നതിനിടയില്‍ ഹെലികോപ്റ്റര്‍ നിലത്തിടിച്ച് തലയ്ക്ക് പരിക്കേറ്റാണ് ജയന്‍റെ മരണം ഉണ്ടായത്.

ജയന്‍ മരണത്തിലേക്ക് കുതിക്കുകയായിരിക്കണം. ഇതേ രംഗം ചിത്രീകരിച്ച് തൃപ്തി വരാത്തതു കൊണ്ട് വീണ്ടുമൊരിക്കല്‍കൂടി നിര്‍ബന്ധിച്ച് ഷൂട്ട് ചെയ്യിക്കുകയായിരുന്നു അദ്ദേഹം.

42 -ാം വയസ്സില്‍ ആ സാഹസിക നടന്‍ നമ്മെ വിട്ടുപിരിഞ്ഞു.